Улс төрчдийн үгэнд  итгэх их хэцүү болж дээ. Хэвлэл мэдээллийн хэрэгслээр тэдний ярьсан зүйлүүдээс эргэцүүлэн цэгнэж суухад амьдрал дээр хэрэгжиж биелсэн юм тун бага байх юм. Өнгөрсөн хавар, гуравдугаар сарын 28-ны өдрийн  “Өдрийн сонин”-д Боловсрол соёл, шинжлэх ухаан, спортын сайд Ё.Баатарбилэгийн  ярилцлага нийтлэгджээ. Сэтгүүлч нь түүний ярьсан зүйлүүдээс онцгойлоод “Ирэх есдүгээр сар гэхэд Ерөнхий боловсролын сургуулийн сурах бичгийг хүрэлцээтэй болгоно” гэснээр нь  сүрхий том гарчиг тавьсан байв. Ярилцлагадаа мань хүн Ерөнхий боловсролын сургуулийн сурах бичгийг үнэхээр хүрэлцээтэй хэмжээнд хэвлүүлнэ гэжээ. Харин одоо энэ нь хэрэгжив үү гэвэл үгүй юм байна.

Есдүгээр сарын нэгний байдлаар сурагчдын сурах бичгийн хангалт дөнгөж дөч орчим хувьтай байсан нь хоёр сар гаруйн дараа буюу өнөөдөр бараг хэвээрээ байгаа ажээ. Нийтдээ 180 гаруй мянган хүүхдийн сурах бичгийн асуудал бүрэн шийдэгдээгүй байна. Тодруулбал, Азийн хөгжлийн банкнаас дэмжлэг авч санхүүжүүлэх санамж бичигт гарын үсэг зурсан гэх боловч хэвлэх үйлдвэрээс сурах бичгүүд нь салаагүй, 6-12 дугаар ангийн зарим сурах бичиг хэвлэлтэнд ороогүй, зохиогчдынхоо гараар хөглөрч байгаа аж. Санхүүжилтийн хувьд Азийн хөгжлийн банкны энэ жилиийн төсөв төлөвлөгөөнд тусгагдаагүй зүйл байсан учраас нэлээд цаг хугацаа шаардагдсан гэж албаны эх сурвалжууд хэлж байна.  Мөн яамны зарим түшмэд нь хэвлэгдээгүй байгаа бүх сурах бичгийг энэ оны аравдугаар сард багтаан хэвлүүлнэ хэмээн бардам ярьцгааж байсан ч одоо болохоор бас л яасан нь мэдэгдэхгүй таг чиг болжээ. Сураг сонсохноо тендерийн бичиг баримтууд нь нэлээд хожуу бүрдэж, энэ мэтээс болоод сонгон шалгаруулалт нь ч удааширсан юм гэнэ. Хичээлийн шинэ жил эхлээд гурав дахь сарынхаа тэн хагаст орж байхад сурагчид нь сурах бичиггүйгээр өдөр хоногийг өнгөрүүлж буй манайх шиг улс орон үгүй болов уу.

Сурагчид  зарим сурах бичгээ түрээсээр ашиглана гэж байгаа. Түрээсийн төлбөрт номынхоо элэгдэл хорогдолыг тооцоод үнийн дүнгийнх нь 40 орчим хувьтай тэнцэх хэмжээний мөнгийг номын сандаа тушаана. Нэг сурагч гурван ном түрээсээр авч ашиглахад овоо мөнгө төлж таарах гээд байна. Ядмагхан өрх айлд энэ нь бас л хөөрхөн дарамт учруулна. Үүнээс бэрхшээсэн сурагчдын нэг хэсэг нь түрээсийн ном авч аав, ээждээ лай хураахгүй гээд ном ч үгүй, юу ч үгүй л сулдаа гунхах болжээ. Эдгээрээс харахад БСШУС-ын сайд Ё.Баатарбилэг одоогоос найман сар гаруйн өмнө жигтэйхэн гоё юм амлаад, “Есдүгээр сар гэхэд сурах бичгийг хүрэлцээтэй болгоно” гэсэн нь талаар өнгөрч, шал худал яриа болоод байгаа юм байна.

О.Баяр

Эх сурвалж: Түмэн.мн