Төрийн алба төрлийнх болсныг бататгасан ээлжит хүнээр “Багануур“ ХК-ийн захирал Э.Номинчулуун тодроод байна. Учир нь тэрбээр эхнэр Х.Цэцэгмаагаа  компанийнхаа  худалдан авах хангамжийн хэлтэс, шатахуун түгээх станцын менежерээр томилсон тухай мэдээлэл олны анхаарлыг ид татаж байна.

 Төрийн албан дахь ураг төрлийн холбоотой хүмүүс олон байдаг ч түүн шиг өөрийн удирдаж буй компанидаа авааль эхнэрээ аваад ирсэн хүн арай л байхгүй санагдана. Тэгвэл Э.Номинчулуун захирлын эхнэрээ ийнхүү дэргэдээ авсны сацуу эгч Хишгээгээ  Багануурын төлөөлөгчийн газар, санхүүгийн хэлтэст ажиллуулдаг гэсэн мэдээлэл байгаа юм.

“Багануур” ХК бол Монгол Улсын нүүрсний хэрэглээний 60 хувь, эрчим хүчний нүүрсний 70 хувийг дангаараа хангадаг, дөрвөн арваны түүхтэй компани. Э.Номинчулуун захирал компанийнхаа веб хуудсаар дамжуулан илэрхийлсэн мэндчилгээндээ Бид Тогтвортой хөгжлийг хангасан, мэдлэг инновацид суурилсан үндэсний тэргүүлэгч компани болохыг эрхэм зорилгоо болгон ажиллаж байна. Байгуулагдсан цагаасаа эхлэн эх орныхоо цахилгаан дулаан хангамжийн найдвартай эх үүсвэр байсаар ирсэн манай уурхайн хамт олон нийгмийн хариуцлагаа цаг ямагт биелүүлсээр ирсэн. Түүгээрээ бахархдаг. Ард иргэдийн нууруун дээр ирэх үнийн өсөлтийг аль болох бага байлгах гэж Монгол Улсын Засгийн газар бидний олборлосон нүүрсний үнийг өөрийн өртгөөс нь доогуур тогтоон, хатуу барьсаар ирсэн. Хэдийгээр зах зээлийн зарчимд нийцэхгүй арга хэмжээ болов ч, төр өөрийн мэдлийн компаниараа дамжуулан иргэддээ үзүүлж байгаа хөнгөлөлт чөлөөлөлт гэж ойлгож болно. Үүнээс улбаалан, тус компани олон жилийн турш алдагдал хүлээсээр байгаа нь нийгмийн хариуцлагаа хэрэгжүүлж байгаагийн хамгийн тод жишээ юм. Монгол улсын төрийн өмчит компаниудаас манай компани анх удаа “Компанийн нийгмийн хариуцлагын стратеги” боловсруулж батлан Олон улсын жишиг хандлагад хүрэхийг зорин ажиллаж байна” гэхчлэн өгүүлжээ.

Үнэхээр л олон улсын жишиг хандлагад нийцсэн компани болох гээд буй юм бол өөрийн төрөл садангуудаа компанийн хариуцлагатай албанд ажиллуулмааргүй байгаа юм л даа. Гэтэл тэрбээр хэлсэн ярьсныхаа эсрэг зүйл хийж, эхнэрээ дэргэдээ авчирсан бололтой юм. Төрийн өмчит компаниудын алдагдал жилээс жилд нэмэгдсээр байгаа нь удирдлагын түвшинд хөшүүн хойрго байгаатай зайлшгүй холбоотой. Түүнчлэн “Багануур” ХК-ийн хувьд ч зах зээлийн зарчимд нийцүүлэх чиглэлд удирдлагын түвшнээс идэвх санаачилга гаргалгүй, нөхцөл байдалтай эвлэрсээр байгаа нь эхнэрээ компанидаа ажилд авч, өөрсдийн амин хувийн эрх ашгаа бодож буйгаас харагдаж байна.