Их гүрнүүдэд дайныг бизнес олз гэж харах нь бий, мөнхүү монголчууд бид “Зовлон болоход лам зоолж, зуд болоход нохой зоолдог” ч гэдэг. Цар тахлын дэгдэлтийн үед хэтэвчээ зузаалах арга сүвэгчилж байгаа алба хаагчдын тухай мэдээлэл гарах болов. Өнөөдөр цар тахал гамшгийн хэмжээнд очих төлөв байгааг мэргэжлийн байгууллагаас анхааруулж төр засгаас ч бүсээ тайлах завгүй тэмцэж байхад амин хувийн эрх ашгийнхаа төлөө ийнхүү улайрч байгааг юу гэж хэлэх вэ.

Тэгвэл Халдварт өвчин судлалын үндэсний төвийн ажилтан Н эмнэлгийнхээ гадаа талбайд хувийн автомашиндаа мөнгө олох замаар нэг иргэнээс 40-60 мянган төгрөгөөр үнэлэн шинжилгээ авч байжээ. Үүнийг өдгөө Авлигатай тэмцэх газраас шалгаж эхэлжээ.

Тодотговол Халдварт өвчин судлалын үндэсний төвийн удирдах албан тушаалтан Э, Д нар Дэлхийн эрүүл мэндийн байгууллага, Эрүүл мэндийн яамнаас тус төвд хуваарилсан оношлуур, хэрэгслийг худалдан авснаар бүртгэж хувьдаа ашиг олсон, мөн хаана үйлдвэрлэсэн нь тодорхой бус 74.400 ширхэг ПГУ-ын оношлуур, түргэвчилсэн 8160 ширхэг оношлуурыг захиалан авсан нь тогтоогдсон байна.

Халдварт өвчин судлалын үндэсний төвийн хариу арга хэмжээний багийн гишүүн Н тусгаарлах байранд ороогүй халдвартай иргэнийг ес хоногийн турш тусгаарлах байранд байгаа гэх бүртгэлийг гаргасан.

Унгар улс руу зорчсон иргэн З-ийн ПГУ-ын шинжилгээний хариу эерэг гарсан байтал сөрөг гэсэн хариу өгч  Европ руу нисгэсэн. Хариу арга хэмжээний багт ажилладаг О хөдөө явах ажилтай найз Л-ын нэрийн өмнөөс ПГУ-ын шинжилгээг өгсөн гэх мэдээллүүд гарлаа. Улсын төсвөөс ПГУ-ын оношлуурыг мэргэжлийн байгууллагуудад  үнэгүй олгож, иргэдээс ПГУ-ын шинжилгээг төлбөргүй авах дүрэм журам хүчин төгөлдөр хэрэгжиж байсаар атал дээрх нэр бүхий хүмүүс тус шинжилгээг үнэтэй болгож иргэдээс мөнгө авах, шинжилгээний сорьцыг лабораторид оруулан үр дүнг нь үзэлгүй хариуг нь сөрөг гаргах зэрэг хууль бус үйлдлийг үнэхээр гаргасан уу гэдгийг, мөн холбогдох ямар дүрэм журам зөрчсөн эсэхийг хууль хяналтын байгууллага эцэслэн тогтоохоор шалгаж байна.

Tumen.mn