Цагдаа, Авлигатай тэмцэх газрынхан сүүлийн саруудад Төрийн банкны ажилтнуудын албан тушаалаа урвуулан ашигласан, авлига хээл хахуулийн  бүлэг хэргийг  нэлээд шуурхай шалгаж байна. Энэ хэрэгт  олон хүн шалгагдаж байгаа аж. Хамгийн сүүлд  тус банкны Ерөнхий захирал Д.Баярсайханд эрүүгийн хэрэг үүсгэжээ.

Өмнө нь Төрийн банкны ажилтан С.Алтанчимэг, Б.Мөнхбүрэн, Ч.Ариунгэрэл нарыг баривчилж цагдан  хорьсон. Мөн  Төрийн банкны гүйцэтгэх захирлын орлогч Т.Дорждэрэмийн 800 саяын авлигын хэргийг илрүүлж, түүнийг яллагдагчаар татаад байгаа юм. Т.Дорждэрэм нь албан тушаалаа урвуулан ашиглаж,  “Дөрвөлж” компанийн захирал Ц.Алтансүхэд орон нутгийн өмчийг төрийн мэдлийн банканд  барьцаалан 800 сая төгрөгийн зээл бүтээж өгсөнийхөө шанд  25 сая төгрөгийн хахууль авсан нь одоогоор бүрэн нотлогдоод  байгаа аж. 

Түүнчлэн Төрийн банкны тэргүүн дэд захирал Д.Ганбаатар, тус банкны гүйцэтгэх захирал асан Б.Цэндсүрэн нарыг ч бас яллагдагчаар татжээ. Тэднийг их хэмжээний мөнгө хувьдаа завшсан, бусдаас хахууль авсан гэж буруутгаж байна.

Төрийн банкны Ерөнхий захирал Д.Баярсайханыг Монголын парламентад хамгийн олон жил сууж буй Д.Лүндээжанцантай ах дүү садан төрлийн холбоотой гэдгийг  зарим нь сайн мэдэх байх. 2016 оны сонгуулийн дараагаар уг албанд томилогдсон Д.Баярсайханыг  эрх мэдэлтнүүдийн зарим хэсэг нь өнөөх лайтай “60 тэрбум”-ын бүтээгдэхүүн гэдэг юм билээ. Цагдаа, авлигатай тэмцэхийн мөрдөгчид  харин түүнийг хэзээ, хэнээс, хэдэн төгрөгийн авлига авсан талаар одоохондоо олон нийтэд мэдээлээгүй байгаа юм.  Гэхдээ зарим эх сурвалжууд Д.Баярсайханыг  гадаадын компанид давуу эрх, ямба эдлүүлэн, хууль бусаар их хэмжээний зээл олгоход нөлөөлсөн, эсвэл шууд санаачилж хэрэгжүүлсэн байж болзошгүй хэмээн онцолж, хардаж байна. Мөн түүнтэй хам хэргээр Сангийн сайд асан Б.Чойжилсүрэн ч хуулийнхны өмнө мэдүүлэг өгөхөд хүрчээ.

Б.Чойжилсүрэн нь Сангийн сайдаар ажиллаж байхдаа Төрийн банкнаас олгох зээлийн хэмжээг 5 тэрбумаас  хэтрүүлэхгүй байх журам гарган үүрэг, чиглэл өгч  байсан боловч үүнийгээ  зөрчин 2017 оны 6 дугаар сарын 23-нд Төрийн банкны Ерөнхий захирал Д.Баярсайханд  илгээсэн албан бичигтээ “20 тэрбум хүртэл төгрөгийн зээл олгох” гэсэн  байв. Тэгээд  үүнийх нь дагуу Хятадын “Шинжиан шинфа” компанид 20 тэрбумын зээл олгосон байлаа. Дээгүүрээ мөнгөний төлөөх хуйвалдаан ерөнхийдөө  иймэрхүү л аргаар хийгддэг нь одоо нууц биш болжээ. Нөгөөтэйгүүр, Д.Баярсайхан, Б.Чойжилсүрэн нарын аль аль нь “Шинжиан шинфа” компанийн өгөөшийг авч хүртээд тийнхүү хорин тэрбумаар нь зээлдээд туучихсан нь гарцаагүй биз.   

Эдгээрээс үзэхэд төрийн өмчит тус банкнынхан дарга, цэрэггүй бүлэглэн бараг бүгдээрээ шахуу авлига, албан тушаалын хэрэгт холбогдох бололтой. Ер нь Төрийн банкийг хувьчлах чимээнээр тус банкыг  үнэгүйдүүлэх томоохон аян зохион байгуулагдаж буй нь энэ мэтээс бас илт ажээ.

О.Баяр

Түмэн.мн