Монгол Улсын Ерөнхий сайд аа, Төрийн өмчит компанийн захирал П.Ганхүү зөвлөхүүдээрээ дамжуулж татвар төлөгчдийн 20 тэрбум төгрөгийг завшсаныг та мэдсэн үү гэж асуумаар байна. Учир нь Монгол Улсын стратегийн бүх орд тус компани дээр төвлөрч байдаг учраас энэхүү ноцтой асуудал Монголын иргэн бүрд хамааралтай.

Тухайлбал, Эрдэнэс Монгол -ийн гүйцэтгэх захирал П.Ганхүү Багануур ХК-д зээлийн санхүүжилт нэрээр 2019 оны эхээр 20 тэрбум төгрөгийг тус компани шилжүүлжээ. Ингээд хууль бусаар Багануур ХК-ийн данс орсон 20 тэрбум төгрөгийг орсон өдөр нь П.Ганхүүгийн зөвлөх н.Мэргэнбаярын төрсөн дүүгийн компани “Сүмбэр сүлд” бас нэг зөвлөх нь болох О.Батчулууны төрсөн эгчийн компани болох “Бумбат тээл”  ХХК-ийн захирал О.Бямбасүрэн нар банкнаас шууд бэлнээр гаргуулан авчээ.

Хамгийн аймшигтай луйвар нь П.Ганхүү захирал “Эрдэнэс Монгол”-оос энэхүү 20 тэрбум төгрөгийг гаргахдаа тос, дизель, түлш нийлүүлэх гэрээгээр Багануур ХК –руу шилжүүлсэн байгаа юм. Түүгээр ч зогсохгүй өдгөө энэ 20 тэрбум төгрөг Багануур ХК-иас эргэн төлөгдөх боломжгүй гэх зээлийн ангилалд орчихсон байгаа юм.

    Уг нь аливаа бараа бүтээгдэхүүн нийлүүлэхээр бол заавал ч үгүй нээлттэй тендер зарладаг журамтай. Гэтэл хулгай хийхдээ гаргууд болсон Д.Ганхүү захирал энэ бүхнийг умартаж мөрөөрөө ажлаа хийж байсан Багануур ХК-ийн захирал Э.Номинчулууныг уг хууль бус үйлдэлдлээ татан оролцуулж, түүнийг гэмт хэрэгтэн болгочхов.

Тодруулбал, байгууллагынхаа дансаар 20 тэрбум төгрөг авч, хувийн хоёр компанид банкаар дамжуулж бэлнээр өгчихсөн Э.Номинчулуун захирал өдгөө ЭЦГ, АТГ-ын үүдийг сахиж суух болсон аж.

Ямартай ч өнгөрсөн оноос эхэлж хуулийнхны овоо хараанд багтсан Э.Номинчулуун уг хэрэгт өөрийгөө хамааралгүй гэдгээ батлахын тулд Эрдэнэс Монгол ТӨХК-ийн захирал П.Ганхүү “Сүмбэр сүлд” “Бумбат тээл” хоёр компанид манай компаниас орж ирсэн 20 тэрбум төгрөгийг өг гэж удаа дараа дарамталсан  хэмээн мэдүүлэгтээ өгчээ.

 Ингээд түүний энэхүү мэдүүлгийн дараа 2019 оны арванхоёрдугаар сард прокурорын дүгнэлтээр ЭЦГ-ынхан П.Ганхүүгийн албан өрөөнд нэгжлэг хийж битүүмжлэн шалгаж байжээ Учир нь, төрийн мөнгийг ямар ч шалгуургүйгээр хоёр зөвлөхийнхөө компанид өгүүлсэн П.Ганхүү захирал огцом баяжиж өндөр үнэтэй Жапан тауны С-5 блокт тансаг зэрэглэлийн орон сууц худалдан авсан нь түүнийг шалгах нэг үндэслэл нь болсон аж. Ингээд хуулийнхан П.Ганхүүгээс уг орон сууцыг худалдан авсан мөнгөний эх үүсвэрийг нотлохыг шаардсан ч тэр чадаагүй байна. Тиймээс АТГ-ынхан П.Ганхүүг эрх мэдэл, албан тушаалаа урвуулан ашигласан хэмээн дугаар тоот бүхий хавтаст хэрэг нээжээ. Одоо тухайн хэргийг Нийслэлийн хяналтын прокурор Б.Бямбадагва хянаж байгаа.

Хамгийн хачирхалтай хэрэг хийсэн хүн нь П.Ганхүү захирал байхад хууль хяналтынхан яагаад Багануур ХК-ийн захирал Э.Номинчулууныг буруутгаж түүнд ял ногдуулахаар төлөвлөнө вэ. Учир нь, тэрбээр мөрдөн байцаалтад мэдүүлэг өгөхдөө тус компанийн дансруу мөнгө яагаад орсон, орсны дараа хэн дарамталсан, нэр бүхий хоёр компанид өгөх болсон тухайгаа ч тодорхой ярьсан байдаг. Гэтэл гэмт үйлдэл хийсэн П.Ганхүү болон өөрсдийнхөө ах дүүгийн компанид давуу эрх олгосон зөвлөх О.Батчулуун, н.Мэргэнбаяр нарыг яагаад хэргийн гадна үлдээх болов гэдэг нь анхаарал татаж байгаа юм.

Уг нь Монгол Улсын Засгийн газар Эрдэнэс Монгол ХХК-ийг Монгол Улсын стратегийн ордыг эдийн засгийн эргэлтэд оруулах зорилгоор байгуулсан. Үндсэндээ Монгол Улсын гурван сая 238 мянга 479 иргэн 1072 хувьцаатай иргэн бүр Эрдэнэс-Монгол  компанийн нэг ширхэг хувьцааг давхар эзэмшиж ашгаа авах ёстой ч энэ мэт нөхөд бидний мөнгийг өөрийн юм шиг аяглаж хулгайлж буй нь хачирхалтай.Өөрөөр хэлбэл, Эрдэнэс таван толгой-гоос илүү их ашгийг монголчууд Эрдэнэс Монгол ХХК-иас авах ёстой атал П.Ганхүү бидэнд олгогдох ёстой 20 тэрбум төгрөгийг зөвлөхүүдийнхээ компаниудаар дамжуулан авсан нь маш ноцтой асуудал. Үүний цаана тэрхүү их хэмжээний мөнгийг П.Ганхүү хамаарал бүхий Банк бус санхүүгийн байгууллагынхаа эргэлтийн хөрөнгөд нийлүүлсэн байх магадлалтай. Тиймээс Ерөнхий сайд аа, хий дэмий сэлмээ эргүүлж төрийн захиргааны жижиг байгууллагад хүчээ гаргаж байхаарМонгол Улсын стратегийн ордтой тус газарт сэлмээ эргүүлээч гэж хэлмээр байна.

Бид дараагийн удаа Эрдэнэс Монгол ТӨХК-ийн нөөцөд байх ёстой 13 тэрбум төгрөг бас л ор сураггүй алга болсон талаарх мэдээллийг хүргэх болно.

Нийтлэлч: Р.Саруул