Сирийн үндэсний армийг дэмжиж зэвсгийн туслалцаа үзүүлэх болсон ОХУ зарим техникээ Дамаскийн зүүн бүст татаж ирлээ.

Ингэснээр Башар Асадын цэргүүдэд анх удаа орчин цагийн техник, зэвсэглэлээр хангагдах боломж бүрджээ.

Үүний нэг жишээ бол өчигдөр Сирийн арми нисэгчгүй онгоцоор дайснаа тагнан турших үйл ажиллагааг зохион байгуулж, алан хядах бүлэглэлүүдийн байрлалыг илрүүлэх анхны нислэгээ амжилттай туршжээ.  

“Сирийн засгийн газар өнөөдрөөс эхлэн ОХУ-ын нисэгчгүй онгоцуудыг албан ёсоор алан хядагчдын эсрэг ашиглах болно. Тус онгоцууд Сирийн хойд, өмнөд нутгуудаар тодорхой хуваариар тагнан турших ажиллагаа явуулна” гэж Сирийн засгийн газрын албанаас мэдээлэв. 

“Fox news” агентлагт бичсэнээр ОХУ-ын 24 ширхэг сөнөөгч онгоц, үүн дотор “Сухой Су-25”, “Сухой Су-24”, “Су-27s” зэрэг онгоцууд Сири улсад хүрэлцэн иржээ. Мөн Т-90 загварын 30 гаруй танк Башар Асадын талд дэмжлэг үзүүлэхээр Оросоос авч ирснийг АНУ-ын хиймэл дагуулаас авсан гэрэл зургаар баталгаажуулав.

“Эдгээр техник, зэвсгүүд нь ОХУ-тай хийсэн Сирийн эрх баригчдын хэлэлцээрийн дүнд явагдаж байгаа ажил. Бид цаашлаад SА-22 пуужинг Сирийн нутаг дэвсгэрт байршуулна” хэмээн Дамаск мэдээллээ.