Шинжээчдийн олж тогтоосноор алан хядагчийг Омар Матин гэдэг бөгөөд афган гаралтай АНУ-ын иргэн аж. Тэрбээр дэлхийд нэлээд том тооцогддог “G4S”хувийн хамгаалалтын компанид есөн жилийн турш ажиллаж байжээ. Америкийн Орландо хотод ижил хүйстнүүдийн шөнийн клубт буудалцаан болсны улмаас 50 хүн амиа алдаж, 50 нь шархаджээ. Энэ бол 2001 оны есдүгээр сарын 11-ний алан хядах ажиллагаанаас хойших хамгийн том буудалцаан, аллага юм.
Клубын үйлчлүүлэгч нэгэн бүсгүй “Буун дуу ар араасаа гарсаар байсан. Бараг нэг бүтэн дуу дуустал үргэлжилсэн байх. Яг л ёслолын буудлага болж байгаа юм шиг “бам, бам бам” гэж дуугарсаар байсан” гэж ярьжээ. Дижейгийн хэлснээр зааланд хэн нэгэн динамит дэлбэлж байгаа юм шиг сонсогдсон тул гайхаад дуугаа бага зэрэг намсгатал буудалцаан болж байсан гэнэ.

Гурван цаг үргэлжилсэн там

Гэмт этгээд орон нутгийн цагаар шөнийн хоёр цагийн үед “Pulse”клубт орж ирсэн байна. Амралтын өдөр байсан болохоор клубт олон хүн үйлчлүүлж байсан бөгөөд ойролцоогоор 350 орчим хүн зугаацаж байжээ. Алан хядагч AR-15 хагас автомат буугаар шууд гал нээж эхэлсэн байна. Энэ үеэр хүмүүс айж цочирдон тал тал тийшээ тарсан ч гэмт хэрэгтэн хэдэн арван хүнийг барьцаалж чаджээ. Зарим үйлчлүүлэгч ариун цэврийн өрөөнд бүгж, тусламж дуудан хашхирч байжээ.
Тусгай албаныхан хоёр ч дэлбэрэлт үйлдэж, гэмт этгээдийн анхаарлыг сарниулсан байна. Үүний үр дүнд нэлээд хэдэн барьцаалагдсан хүн суллагдаж чаджээ. Ийнхүү эсэргүүцэл гурван цагийн турш үргэлжилсэн аж. Хамгийн сүүлд тусгай албаны дайчид хуягт машины тусламжтайгаар клубын хаалгыг эвдэн орж, гэмт этгээдийг гэрэл, дуут гранатаар чихийг нь дөжрүүлж байгаад бууджээ. Конгрессийн гишүүн Алан Грейсон “Хаа сайгүй цусанд будагдсан байсан. Мэргэжилтнүүд баримт нотолгоог цуглуулах ажилтай боллоо” гэж мэдэгджээ.

Алан хядагч хамгаалалтын томоохон компанид ажилладаг байжээ

Шинжээчдийн олж тогтоосноор алан хядагчийг Омар Матин гэдэг бөгөөд афган гаралтай АНУ-ын иргэн аж. Тэрбээр дэлхийд нэлээд том тооцогддог “G4S”хувийн хамгаалалтын компанид есөн жилийн турш ажиллаж байжээ. Энэхүү олон улсын компани нь Лондонд төвтэй ч АНУ-д, тэр дундаа Флоридад төлөөлөгчийн газартай юм байна. Өдгөө 29 настай гэмт этгээд хоёр удаа гэрлэсэн бөгөөд анхных нь эхнэр Узбекистанаас ирсэн нэгэн байжээ. Тэд 2008 онд салсан аж. Ингээд Омар Матин 2009 онд хоёр дахиа гэрлэсэн ч 2011 онд гэр бүлээ цуцлуулжээ. Түүнийг эхнэртээ байнга гар хүрдэг байсан тухай “The Washington Post”сонинд мэдээлсэн байдаг. Хоёр дахь эхнэр нь түүнийг сэтгэцийн эмгэгтэй, цагдаа болохыг хүсдэг байсан гэж мэдэгджээ.

Ижил хүйстнүүдийг үзэн ядсанаас уу, исламын үзлийг дагаснаас уу

“Болсон үйл явдалд уучлалт хүсч байна. Бид яг л улс орон даяар айж цочирдсон шиг цочирдлоо” хэмээн алуурчны эцэг Мир Садик хэлжээ. Түүний ярьснаар хүү нь ижил хүйстнүүдийг үзэн яддагаа хэд хэдэн удаа илэрхийлж байсан бөгөөд нэгэн удаа эхнэр, хүүхдийнх нь нүдэн дээр үнсэлцэж буй хоёр эрийг хараад тэсэртлээ уурласан гэнэ. Аавынх нь хэлснээр алан хядагч шашинтай холбоотойгоор гэмт хэрэг үйлдээгүй аж. Гэхдээ шинжээчид үүнд эргэлзэж байна. Холбооны мөрдөх товчооны Орландог хариуцсан хэлтсийн тэргүүн Рон Хоппер “Энэ хүн исламын терроризмын үзлийг дагадаг гэсэн таамаглал байна” гэж мэдэгджээ. Тагнуулын хорооны гишүүн, Конгрессийн гишүүн Адам Шифф тусгай албаны эх сурвалжаас авсан мэдээлэлдээ үндэслэн хэлэхдээ Матин цуст аллага үйлдэхээсээ өмнө 911 дугаар руу залгаж, “Исламын улс” бүлэглэлийн тангаргийг хэлсэн аж. Холбооны мөрдөх товчооны тайланд дурдсанаар гэмт этгээд алан хядагчидтай холбоотой байж болзошгүй хэмээн гурван удаа сэжиглэгдэж байсан ч хангалттай нотлох баримт олдоогүй тул түүнийг буруутгах боломжгүй байжээ.
“Twitter”-ийн Исламын улс бүлэглэлтэй холбоотой аккаунт гэмт этгээдийн зургийг нийтэлж, алан хядлагын хариуцлагыг хүлээсэн байна.

Улс төрийн үр дагавар

Америкт ийнхүү томоохон алан хядлага болсны дараахан зэвсгийн эргэлт, исламын эрс үзэлтнүүдтэй тэмцэх гэсэн хоёр чухал сэдэв дахин хөндөгдөж эхэлсэн. Хоёр том намаас Ерөнхийлөгчид нэр дэвшиж буй Хиллари Клинтон, Дональд Трамп нар ч Орландод болсон эмгэнэлт явдалтай холбогдуулан мэдэгдэл хийжээ. АНУ-ын тэргүүн хатагтай, Төрийн нарийн бичгийн дарга асан Хиллари Клинтон “Бид улсаа дотоод болон гадаад аюул заналхийллээс хамгаалахын тулд хүчин чармайлтаа хоёр дахин нэмэгдүүлэх шаардлагатай гэдгийг тодорхой харууллаа” гэж мэдэгдсэн бол Трамп “Намайг исламын терроризмын талаар үнэнийг хэлсэн гэж баяр хүргэсэн хүмүүст талархлаа. Гэхдээ би талархлыг хүсээгүй. Би хүчтэй, сонор сэрэмжтэй байхыг хүсч байна” хэмээгээд Обамаг огцрохыг шаарджээ. Харин АНУ-ын Ерөнхийлөгч Барак Обама ард түмэндээ хандаж үг хэлэхдээ “исламын терроризм” гэж огт дурдалгүйгээр “алан хядлага”, “үзэн ядалтаас үүдэлтэй үйлдэл” гэх зэргээр хязгаарлажээ.

Эх сурвалж: