Амралтын өдрүүд Шри-Ланк улсын хувьд эмгэнэл, үхэл хагцалаар дүүрэн өнгөрөв.  Тодруулбал, өчигдөр буюу энэ сарын 21-ний өдөр  тус улсын нийслэл болон орон нутгийн хотуудад бараг нэгэн зэрэг шахуу найман  удаагийн  дэлбэрэлт болж олон хүний амь эрсдээд байна.   Улаан өндөгний баяртай давхцсан энэхүү дэлбэрэлтүүдийг эхнээс нь сайтар төлөвлөж зохион байгуулсан нь анзаарагдаж байна.

Эхний гурван дэлбэрэлт нийслэл Коломбо хотын таван одтой Shangri-La, болон гурван одтой Cinnamon Grand,  Kingsbury зочид буудалд болжээ. Харин гудамжинд хоёр дэлбэрэлт болсон байна.  Түүнчлэн дараагийн дэлбэрэлтүүд Котахена, Негомбо, Баттикалоа хотын католик сүмүүдэд  болжээ. Энэ үеэр тэнд хүмүүс олноор цугларч улаан өндөгний баяраа тэмдэглэж байснаас эрсдэл их гарчээ.  Мөн орон нутгийн  Дехивала  болон  Дематагода хотын орон сууцны хороололд долоо, найм дахь удаагийн дэлбэрэлт болжээ.

Урьдчилсан байдлаар Шри-Ланкагийн сүмүүд болон зочид буудалд  болсон дэлбэрэлтийн улмаас 207 хүн амиа алдаж, 500 орчим хүн бэртсэн тухай  телевизийн “News 1st” суваг мэдээлсэн байна. Амь  үрэгдэгсдийн дунд  гадаадын 35 иргэн байгаа тухай мэдээлжээ. Тэдгээр нь Их Британи, АНУ, БНХАУ-ын иргэд аж.

Ажиглагчид энэ халдлагыг  аялагч жуулчид болон сүсэгтнүүд рүү  чиглэсэн нь илэрхий байна хэмээн онцолжээ.

Шри-Ланкад болсон хэрэг явдалтай уялдуулан дэлхийн улс орнууд эмгэнэл илэрхийлсээр байна. Тухайлбал, “Шри-Ланка дахь шүтлэгийн газарт чиглэсэн халдлага намайг ихээхэн цочирдууллаа. Дээд комиссаруудтай би ярилцсан. Манай албаны хүмүүс Шри-Ланка дахь байгууллагуудтай хүнд цаг үед хамтран ажиллаж байгаа” хэмээн Австралийн Гадаад хэргийн сайд Мэрис Пэйн “Твиттер” хуудсаараа дамжуулан мэдэгдсэн байна.

Халдлага гарахаас 10 хоногийн өмнө Шри-Ланкийн цагдаагийн  газрын дарга  амиа золиослогч алан хядагчид сүмд халдахаар төлөвлөж байж болзошгүйг анхааруулж байжээ.

Одоогоор халдлагын хариуцлагыг хэн нэгэн хүлээгээгүй байгаа бөгөөд үүнийг алан хядах ажиллагаа хэмээн нэрлэж байна.  Гэхдээ хууль сахиулах байгууллагын ажилтнууд энэхүү халдлагыг National Thowheeth Jama'ath (NTJ хэмээн  мусульманы орон нутгийн радикал байгууллагынхан үйлдсэн байх магадлалтай хэмээн үзэж байна. Энэхүү байгууллага нь өнгөрсөн жил  Буддын сум хийдүүдийн эсрэг  мөн иймэрхүү халдлага үйлдэж байсан удаатай юм.

Хамгийн сүүлийн мэдээгээр тус улсын Батлан хамгаалахын сайд халдлагатай холбоотойгоор 10 хүнийг  баривчилж сэжигтнээр шалгаж эхэллээ гэх мэдээг түгээжээ. Коломбо хотод сэжигтнүүдийг баривчлах үеэр цагдаагийн гурван албан хаагч мөн амь үрэгдсэн байна.  

Түүнчлэн Shangri-La зочид буудал болон  сүмд алан хядах ажиллагаа үйлдсэн хоёр амиа золиослогчийн нэр тодорхой болсон бөгөөд тэдгээр нь Исламын Улс бүлэглэлтэй холбоотой байжээ.

Эх сурвалж:  Lenta.ru

Бэлтгэсэн:М.Нэргүй