Шадар сайдаар томилогдоод удаагүй С.Амарсайханыг огцруулах ажиллагаа Тусгаар тогтнолын ордноос эхэллээ. Ажлаа аваад 2 сарын нүүр үзэж байгаа Шадар сайд С.Амарсайхан цар тахлын амаргүй үед ширээний ард суухаас илүүтэй нөхцөл байдалтай газар дээр нь танилцаж, шийдвэрлэх арга замыг эрэлхийлж яваа, уг нь.
Гэтэл Гүйцэтгэх засаглалын тэргүүнээсээ ч том толгойлж, дур зоргоороо аяглах болсон гэх мессеж цахим орчинд “шидэгдэв”. Улсын онцгой комиссын шийдвэрээс болж хөл хорионы үеэр иргэд, цагдаа нарын дунд үл ойлголцол үүссэн талаар ч өө хайж эхэллээ.
Түүний оронд Н.Энхбаярыг Шадар сайдад томилохоор ийнхүү шалтаг эрж эхэлсэн бололтой. МАН, МАХН нэгдэх нэрийн дор албан тушаалын тохироо явагдаж байна. МАН-ын талаас ажлын хэсгийг Ерөнхий нарийн бичгийн дарга Д.Амарбаясгалан, МАХН-ын талаас нарийн бичгийн дарга Б.Тулга ахалж байгаа. Ажлын хэсгийн уулзалт хэд хэдэн удаа явагдсан бөгөөд Н.Энхбаяр, У.Хүрэлсүх нар ч нүүр тулан уулзалдаж, төв гудамд хөтлөлцөн гарч ирсэн.
Үзэл баримтлал, түүх нэгтэй хоёр нам жинхэнэ утгаараа нэгдэж нийлэх нь нэр бүхий хоёр хүний шийдэх асуудал биш. Хоёр намын гишүүдээс санал хураалт явуулахын зэрэгцээ дэмжигдсэн тохиолдолд хууль эрх зүйн хувьд өөрчлөлт оруулах, эрх мэдлийг хэрхэн тусгахаас эхлээд олон асуудал дагалдана.
Харин “нэгдэх” нэрийн дор эвсэх нь хоёр намын дарга тэрүүхэндээ тохирчих төдийгүй хэн хэндээ ашигтай хувилбар.
Тиймдээ ч ажлын хэсэг нэгдэх гэхээс эвсэх байр суурин дээр тохироо хийж байгаа. Н.Энхбаярын зүгээс нөхөн сонгуульд ялалт байгуулах, Засгийн газарт суудал авах болзол тавьж. Хариуд нь С.Ганбаатарыг Ерөнхийлөгчийн сонгуульд нэр дэвшүүлж МАН-ын саналыг хуваан АН-д боломж олгохгүй байхаар тохиров. Тэрбайтугай сонгуульд хамтран оролцож, хүчээ нэгтгэнэ.
С.Ганбаатараас өөр урдаа барих хөзөргүй болсон Н.Энхбаярт хожоотой тохироо. Хүүгээ парламентад “шахчихна”. Эс бөгөөс өнгөрсөн хугацаанд “женкогийн төлөө” өлссөн гэгдэж буй “босоо” Ганбаагаас цаашид юу ч гарч байж мэдэх.
Парламент дахь ганц гишүүний суудал МАН-д тийм хортой бус. Тиймээс тохиролцооны эхлэл болгож Ж.Сандагсүрэнгийн асуудал дээр Д.Сумъяабазартай тохиролцон хотын орлогчийнх нь статусийг үлдээв. Харин Н.Энхбаярыг Засгийн газартаа багтаах гэдэг өөр асуудал. Тэрбээр Шадар сайдаас гадна дэд сайдын суудал хүссэн мэдээлэл байна.
Ирэх зургадугаар сарын 9-нд Ерөнхийлөгчийн сонгууль болно. Үүнээс 40 хоногийн өмнө буюу ирэх дөрөвдүгээр сарын 9-нөөс өмнө Н.Энхбаярын хүсэлтийн хариуг шийдвэрлэх учиртай.
Эх орончдын өдрөөр хамтдаа цэцэг өргөж, ханатал инээж зогссон тэдний инээмсэглэлийн ард шадар сайд С.Амарсайханы суудал байж. У.Хүрэлсүх, Н.Энхбаярын болзлыг хүлээн авсан гэсэн үг.
Шадар сайд болон Засгийн газрын гишүүн биеийн эрүүл мэндийн байдал, хүндэтгэн үзэх бусад шалтгаанаар бүрэн эрхээ хэрэгжүүлэх боломжгүй болсон бол албан тушаалаас чөлөөлөгдөх хүсэлтээ Ерөнхий сайдад өргөн мэдүүлж болно.
Гэтэл С.Амарсайханы хувьд эрүүл мэнд болон бусад хүндэтгэн үзэх шалтгаан одоогоор байдаггүй нь гачлантай. Тиймээс шалтаг, шалтгаан зааж, суудлаас нь хөндийлөх хөдөлгөөн өрнөж эхэлсэн нь энэ юм байх.
Туулын бургасыг хядсан гэх давалгаа ч дахин эхэлнэ. Энэ мэтчилэн ямар нэг байдлаар ойрын хугацаанд С.Амарсайханыг огцруулах ажиллагаа өрнөж, хаврын чуулганы нээлттэй зэрэгцэн Н.Энхбаяр Засгийн газрын бүрэлдэхүүнд багтаж, Ц.Нямдоржтой тохой нийлүүлэн суух нь. Тавилан гэдэг ёстой л энэ биз.
Эх сурвалж: Niigmiintoli.mn
