МАН МАХН хоёр нэгдэх тухай асуудал наанаа оволзож байгаа ч цаанаа нуман тулгуурт ороод байгааг эх сурвалж хэллээ. Учир нь МАХН-ын дарга Н.Энхбаяр нэгэнт нэгдэх гэж байгаа учраас яаралтай Засгийн газарт хамтарч орох тухай санал юм. Харин эрх баригч намынхан МАХН-ын Засгийн газарт орох саналыг хүлээн аваад сар гаруй болсон ч бодитой хариу өгөлгүй удаасан байна. Гэхдээ эрх баригч намыхан Ерөнхийлөгчийн сонгууль дөхөж байгаа учраас асуудлыг нэг тийшээ болгох эсэх тухай асуудлаар удирдах түвшиний хурал зохион байгуулж, тэдний саналыг эхний байдлаар хүлээн авчээ.  

Тодотговол, МАХН-ын хувьд Шадар сайд, Хүнс хөдөө аж ахуй, хөнгөн үйлдвэрийн яам, Зам, тээврийн хөгжлийн яам гэсэн гурван салбарыг авч хамтарна гэдгээ мэдэгдээд байгаа аж. Үүний дагуу удаа дараагийн шахалтаар МАХН-д хүссэн яам, сайдын суудлыг нь өгөхөөс өөр аргагүй байдалд хүрсэн гэх. Тэгэхээр Шадар сайд С.Амарсайхан, Хүнс хөдөө аж ахуй, хөнгөн үйлдвэрийн сайд З.Мэндсайхан, Зам, тээвэр хөгжлийн сайд Л.Халтар гурвыг эргүүлэн татах болоод байна.

Тэр тусмаа З.Мэндсайханы хувьд томилогдсон цагаасаа хойш салбартаа гологдож байгаа учраас харамсах юмгүй, эргүүлэн татчих байх. Арга ч үгүй “Монхангай хаус” компанид хэлтсийн менежер, захирлаар ажлынхаа гарааг эхлүүлж байсан бизнесмэн нөхөр. Төрийн ажилд албаны дадлага туршлага гэх юм алга. Тэр үүнээс хойш хоёр компанид гүйцэтгэх захирлын алба хашиж байгаад бүр хожим 2016 онд МАН үнэмлэхүй ялалт байгуулахад Сангийн яаманд Төсвийн хөрөнгө оруулалтын газрын даргаар төрд хөл тавьж байсан нөхөр. Түүнд өдгөө тэргүүлж байгаа салбартаа ажиллаж байсан туршлага ч байхгүй, нэг бизнесмэн шүү дээ.

Ойрын жишээ дурдахад өнгөрөгч өвлийн цас зудны үед хэрхэн ажилласан тухай асуудал өдгөө ч замхараагүй байна. Малчид маань ёстой л бор зүрхээрээ өвлийг давсан. Тойрог тойргоос сонгогдсон гишүүд цаг зудын байдалд анхаарснаас З.Мэндсайхан ямар ч бодлого гаргаж ажиллаагүй гэх шүүмжлэл байдаг. Одоо ид хаврын тариалалт эхэлчихсэн байхад ковид хэмээх хаалт тавьчихаад ажил тийм ч сайнгүй байгааг эх сурвалж хэлсэн юм. Ийнхүү үүсээд байгаа нөхцөл байдлаас харахад энэ Засгийн газраас хамгийн түрүүнд З.Мэндсайхан хэмээх шүдийг суга татах нь гарцаагүй. Нэгэнт том зорилгын төлөө Н.Энхбаярт найр тавьсан эрх баригчид хүссэн Шадар сайд, Зам, тээврийн хөгжлийн сайд нарыг ч татах нь ойлгомжтой. Том эрх ашгийн төлөө гуйлгах шахам очиж байгаа Н.Энхбаяр ч хүссэн яамаа авч л таарна.

З.Шатар

Түмэн.мн