Олон удаагийн илт буруу шийдвэр, арга хэмжээ, эрх мэдэлтнүүдийн эдэлж байгаа “дабль стандарт” зэрэг нь төр засаг цар тахлын эсрэг тэмцэлд нэгэнт ялагдаж эцэст иргэдээ “үхэх нь үхээд сэхэх нь сэх” хэмээн хөсөр хаясны нотолгоо юм. Иргэд чадлаараа амны хаалтаа сольж зүүн халдвараас сэргийлж байна. Орлогын хувьд илт муудсан тэдэнд өдөр бүр С, Д аминдэм авч уух мөнгө ч алга. Тэгвэл төрийн мөнгөн дээр суусан дарга төсвийн хөрөнгөнөөс сая саяыг зарцуулан өөрсдийн дархлаагаа дэмжиж байна. Өнгөрсөн 6-р сард Баянгол дүүргийн ИТХ-ын дарга Б.Сэмжидмаа тушаал гарган 19 сая төгрөгөөр өөрийнхөө болон дэд дарга нар, ИТХ-ын төлөөлөгчид, Нийтийн хурлын дарга нарт аминдэмийн багц олгожээ. Энэхүү багц коронавирусээр өвдсөн хүмүүст төрөөс өгч байгаа багцны дэргэд тэнгэр газар шиг зөрүүтэй. Төрөөс өгч байгаа байгаа багцад Витамин С 1000 мг-тай нь 20 ширхэг байгаа бол Баянголын дарга нар 150 ширхэгийг төсвийн мөнгөөр авч уужээ. Коронвирус туссан иргэн Витамин Д 4000 мг-тай 10 ширхэгийг авч байгаа бол Баянголын ИТХ-ын багцад 45 мянган төгрөгний үнэтэй 150 ширхэг оржээ. Ингээд нэг багц нь 132 мянган төгрөг болсон бол төрөөс иргэдэд өгч байгаа багц 70 мянгын л үнэтэй байдаг. Цар тахлын хүнд үед зарцуулагдаж буй төгрөг бүр иргэд рүү, эрсдэлт бүлэг рүү чиглэсэн байх ёстой. Гэтэл энэ жишээн дээр доошоо биш дээшээ зарцуулагджээ. Улиралд хоёр сая төгрөгний урамшуулал авдаг Баянголын ИТХ-ын төлөөлөгч нарын дунд өөрийнхөө мөнгөөр хэдэн “Зөв” аарц, чацаргана аваад уучих хүн байдаггүй аж. ИТХ-ын ажлын албаныхан үр дүнгийн урамшуулал авдаг. ИТХ-ын дарга Б.Сэмжидмаа л гэхэд дүүргийн Цагаатгах ажлын удирдах салбар комиссын даргын хувиар цалингийн 20 хувь, үр дүнгийн гээд 30 хувийн урамшуулал авсан байна. Дээрхи багцыг нийтдээ 120 гаруй хүн авсанаас дийлэнхи нь ИТХ-ын дарга, дэд дарга, хэлтсийн дарга, ИТХ-ын төлөөлөгчид бөөнөөр, хорооны Нийтийн хурлын дарга, Нийтийн хурлын нарийн бичгийн дарга гээд дарга нар аж. Төсвийн 19 сая төгрөг нь их хөрөнгө юм. Даанч энэ мөнгийг ковид-19-ын халдвар авах эрсдэлтэй бүлэгт эсвэл өвчилсөн хүмүүсийг алгасаад дарга нарт очжээ.

Alim.mn