Коронавирусийн халдвар, эндэгдэл эрчимтэй нэмэгдэж байгаатай холбогдуулан ОХУ-ын ерөнхийлөгч иргэдээ долоо хоног гэрт нь амраах захирамжийг Лхагва гарагт гаргаж байсан билээ.
Тэгвэл нийслэл Москва хотын захиргаа Пүрэв гарагт бүх сургууль, үйлчилгээний байгууллагууд, онц шаардлагагүй дэлгүүрүүдийн ажиллагааг хоёр долоо хоногийн турш зогсоох шийдвэрийг зарласан байна.
“Москва хот байж болох хамгийн муу нөхцөл байдал байна. Ойрын өдрүүдэд Covid-19 өвчний эндэгдэл оргилдоо хүрэх төлөвтэй” гэж тус хотын захирагч Сергей Собянин мэдэгдэлдээ өгүүлжээ.
Аравдугаар сарын 28-наас арваннэгдүгээр сарын 7 хүртэл өдрүүдэд ОХУ-ын нийслэл ажлын бус горимд шилжих юм.
Энэ өдрүүдэд зөвхөн хотын дэд бүтцийн тасралтгүй ажиллагааг хангах үүрэгтэй онцгой салбарууд, хүнс хангамж, эрүүл мэндийн салбарууд ажиллах ажээ. Бусад бүх худалдаа, үйлчилгээ, нийтийн хоол, соёл урлаг, амралт, зугаа цэнгээний газрууд үйл ажиллагаагаа зогсооно. Ресторанууд зөвхөн хүргэлт, гадагш авч явах хоолоор үйлчлэх гэнэ.
Хотын засаг захиргааны байгууллагууд, сургууль, цэцэрлэгүүд бас хаагдахаар болжээ.
“Ажлын бус өдрүүд коронавирусийн тархалтын гинжин хэлхээг тасалж, эндэгдлийн тоог бууруулдаг нь бидний туршлагаас харагддаг. Тиймээс олон хүний амь насыг аврахын тулд хэсэг хугацаанд амарсны дараа хэвийн амьдралдаа эргэж орцгооё” гэж Собянин хотынхоо оршин суугчдад уриалжээ.
Пүрэв гарагт ОХУ даяар 1,038 хүн нас барж, 36,339 халдварын тохиолдол шинээр бүртгэгдсэн нь хоёул цар тахал эхэлсэн цагаас хойших хамгийн өндөр үзүүлэлт болсон юм.
Эх сурвалж: Russia Today
