Олон улсын эрчим хүчний форум (IEF)-ын Ерөнхий нарийн бичгийн дарга Жозеф Макмонигл 2022 оны 3 дугаар сарын 29-ний өдөр Bloomberg-т ярилцлага өгөхдөө, барууны орнуудын ОХУ-д хориг тавьж байгаа энэ үед Оросын газрын тосны нийлүүлэлтийн хэмжээ буурах тохиолдолд газрын тосны үнэ 150 ам.долларт хүрч болзошгүй байна.

Мөн тэрээр хэлэхдээ ОХУ, Украины нутаг дэвсгэрт довтолсны дараагаар Оросын газрын тосны нийлүүлэлт өдөрт ойролцоогоор 1.5 сая баррелиар буурна гэсэн болов ч зах зээлд үзүүлэх бодит нөлөөллийг дүгнэхэд дахин хоёр долоо хоног шаардагдана гэжээ. Тиймээс ирэх саруудад үнийн маш том хэлбэлзэл, урт хугацаанд үнэ 150 ам.доллар/баррель хүрэхийг хүлээж буйгаа мэдэгдлээ.

Газрын тосны үнийн өсөлт нь дэлхийн эрэлтэд ямар нэгэн нөлөө үзүүлээгүй бөгөөд дэлхийн газрын тосны эрэлт цар тахлын өмнөх үеийнхтэй харьцуулахад 98 хувь, нийлүүлэлт нь 95 хувьд хүрсэн байна. Эрэлт/нийлүүлэлтийн зөрүү нь ОПЕК+ болон түүний зарим гишүүд өөрсдийн квотдоо хүрч чадахгүй байгаатай холбоотой гэж үзэж байгаа ч эрэлт/нийлүүлэлтийн зөрүүгийн тал хувь нь АНУ-д ногдож байна. Хөрөнгийн сахилга бат, нийлүүлэлтийн хязгаарлалт нь Америкийн газрын тос үйлдвэрлэгчдийг хоёр жилийн өмнө цар тахалд нэрвэгдэхээс өмнөх шигээ их хэмжээгээр олборлоход саад болж байна гэж Макмонигл хэлэв.

Эрчим хүчний салбарын бусад шинжээчид болон хөрөнгө оруулалтын банкуудын үзэж буйгаар ОХУ-ын газрын тосны нийлүүлэлтэд хязгаар тавихад газрын тосны үнэ 150 ам.доллар/баррель хүрнэ гэж байна.

Тодруулбал, ОХУ-ын зах зээлд нийлүүлэх газрын тосны тасалдал бүтэн жилийн турш үргэлжилбэл Брентийн үнэ 185 ам.доллар/баррельд хүрч, дэлхийн газрын тосны эрэлт өдөрт 3 сая баррелиар мэдэгдэхүйц буурах магадлалтай болохыг J.P. Morgan Global Research 2022 оны 3 дугаар сарын эхээр мэдэгдэв.

Нэмж дурдахад, ОПЕК болон ОПЕК+ бүлэг 2022 оны 3 дугаар сарын 24-ний өдөр хуралдаж, өмнө тохирсон өдөрт 400,000 баррелиар нэмэгдүүлэх нийлүүлэлтийн бодлогоо ирэх 5 дугаар сард хэвээр үлдээх ихээхэн магадлалтай байгааг хэд хэдэн эх сурвалж мэдэгджээ.

ОПЕК+ бүлгийн гол гишүүд болох Саудын Араб, Арабын Нэгдсэн Эмират улсууд Украинд түрэмгийлсэн Оросын эсрэг арга хэмжээ авахгүй гэдгээ мэдэгдэж, тус бүлэг нь улс төрийн нөхцөл байдлыг үл харгалзан зөвхөн зах зээлийг тогтворжуулах зорилготой гэдгээ мэдэгдсэн байна.

Эх сурвалж: OilPrice.com, investing.com