Австрали улсад сурч ажиллах сонирхолтой монгол иргэдийн тоо олширчээ.

Тодруулбал, энэ оны эхний дөрвөн сарын байдлаар 3358 иргэн Австрали улсыг зорьсон байна. Зорчигчдын дийлэнх буюу 85 хувь нь насанд хүрэгчид ажээ.

Иргэдийн тус улсыг зорих шалтгаанаас дурдвал,

• Аялах - 38
• Ажиллах - 37
• Суралцах - 17 хувийг тус тус эзэлж байгаа юм. Мөн байнга оршин суухаар 147 иргэн явсан байна.

Тус улс руу,

• 30 хүртэлх хоногоор - 1975
• 30-90 хүртэлх хоногоор - 348
• 90-ээс дээш хоногоор - 1035 иргэн зорчжээ.

Тэгвэл тус улсыг зорьсон иргэдийн нэг болох О.Оджаргалтай ярилцлаа.

-Австрали улсыг яагаад зорих болсон бэ?

-Гэр бүлээрээ ажиллаж амьдрах бүрэн боломж энэ улсад байгааг олж харсан. Эрүүл амар тайван орчин, дээд боловсрол, хамгийн энгийндээ чанартай хүнс энд байдаг. Монголд чадлаараа хичээсэн ч тэр хэрээрээ цалинждаггүй. Ёстой л цалинтай тулдаа өртэй амьдарч байлаа.

-Монгол мөнгөөр өдөрт хэдэн төгрөгний цалин авдаг вэ?

-Эрэгтэй, эмэгтэй хүмүүсийн цалин ялгаатай байдаг. Ихэвчлэн барилгын ажлыг эрэгтэйчүүд, цэвэрлэгээ үйлчилгээг эмэгтэйчүүд хийдэг. Нэг цагт дунджаар 22-35 австрали долларын цалин авдаг. Монгол мөнгөөр 520–840 мянган төгрөгтэй тэнцэнэ гэсэн үг.

-Визний хариу хэдэн хонгийн дотор ирсэн бэ. Урьд нь виз мэдүүлж байсан уу?

-Өмнө нь виз мэдүүлж байгаагүй. 45 хоногийн дотор визний хариу гарсан.

-Австрали улсад амьдрахад ямар бэрхшээл тулгарч байна вэ?

-Цалин өндөр байхын хэрээр хэрэглээний зардал, хоол хүнс, сургалтын төлбөрт зардал ихтэй. Жишээлбэл, цэцэрлэгийн хүүхдийн нэг өдрийн төлбөр хамгийн багадаа 150 австрали доллар буюу 360 мянган төгрөгтэй тэнцдэг. Жилээр тооцвол ойролцоогоор 100 сая төгрөг юм. Уг шалтгаанаас үүдэж хүүхдүүдээсээ хол амьдарч байгаа нь миний хувьд хамгийн том бэрхшээл.

-Монгол руу буцаж ирэх бодол бий юу?

-Монгол руу буцахгүй. Хэчнээн хар ажил хийж амьдарч байгаа ч Монголд амьдрахаас илүү сайн амьдралын баталгаатай.

-Ярилцсанд баярлалаа