Хөвсгөлийнхнийг хүчээ нэгтгэе гэж уриалж, сайхан сайхан амлалтууд өгсөөр УИХ-д сонгогдсон эрхэм бол УИХ-ын гишүүн, БШУ-ны сайд Л.Энх-Амгалан. "Боловсон поп" хочит тэрбээр энэ удаагийн сонгуульд Хөвсгөл, Булган, Орхон аймгийн тойргоос нэр дэвшинэ. Сайд гуай ирэх сонгуулийн "битүүхэн" сурталчилгаагаа хамгийн түрүүлж хийж яваа хүн гэж хэлж болно. Тэрбээр өнгөрсөн 4-р сараас эхлэн Орхон, Булган, Хөвсгөл аймгийн иргэдтэй уулзаж, сургууль цэцэрлэгийн шав тавьж, цэцэрлэг сургуулийн барилгыг өргөтгөнө гэж амлалт өгч, "Оюун гийх аян", "Хөгжлийн төлөөх инновацын түншлэл форум", "Шинжлэх ухаанд суурилсан анагаах ухаан сургалт", "Шинжлэх ухаан, инновацыг орон нутагт нутагшуулъя аян", Улсын физикийн 35-р олимпиад" гээд үй олон аян, хөтөлбөр ярьж байна. Энэ олон арга хэмжээ, хөтөлбөр, аян нь нь зөвхөн түүний нэр дэвших тойрогт буюу Орхон, Булган, Хөвсгөл аймагт л өрнөсөөр.
Боловсролын сайд зудад үхсэн малын сэг зэмийг устгасан эсэхэд санаа тавьж, резинэн дээс дээгүүр үсрэх хүүхдүүдийг харж дурсамжаа сэдрээсээр явна. Мөрөн хотынхоо цэцэрлэг бүрээр орж багш, ажилчдынхаа сэтгэгдлийг сонсч, горилж буй тойргийнхоо боловсролын салбарынхныг цуглуулж тулгамдсан асуудлуудыг нь сонссоор л байгаа харагдана. Аймгийнхаа ахмад багш нарт боловсролын салбарын шинэчлэлээ танилцуулаад л, зөвхөн математикийн багш нарыг Хөвсгөл аймагт нь хүлээн авч уулзаад л тэр бүү хэл аймаг бүрт сурагчдын эцэг эхчүүдтэй нь хүртэл уулзалт хийгээд тун завгүй явна.
Олон төрлийн уулзалт, олон янзын аян хөтөлбөр танилцуулж явахаас гадна олон амлалтуудыг ч өгсөөр. Жишээ дурьдвал: Хутаг-Өндөрийг сумдын хөгжлийн төв болгоно, Орон нутагт шинжлэх ухаан технологи инновацыг хөгжүүлж эдийн засгийн эргэлтэд оруулна, залуу багш нарыг ахмад багш нарт дагалдуулан сургана гэж ярьж байна. Харамсалтай нь энэ бүх уулзалтууд, аян, амлалтууд нь зөвхөн түүний нэр дэвших тойрогт л өрнөж буй нь түүнийг Монгол улсын Боловсролын сайд биш хойд бүсийн гурван аймгийн Боловсролын сайд гэлтэй. Сонгуулийн сурталчилгааны гарааны цурхайгаас аль хэдийн үсрээд гарчихсан тэр өдгөө нэр дэвших тойргийнхоо бүх сумдаар бараг тойроод дуусч байна. Ажлын тайлан, салбарын бодлого нэрийн дор сурталчилгаагаа хийсээр, давуу эрх эдэлсээр.
Өнгөрсөн 2020 оны сонгуулиар тэр ямар амлалт өгч байсныг сануулъя.
-Хөвсгөл далайн эрэг дээр Хүүхдийн найрамдал-2 зусланг байгуулна
-Мөрөн нисэх онгоцны буудлыг олон улсын 4С зэрэглэл бүхий зорчигч үйлчилгээний ЦОГЦОЛБОР болгоно
-Хатгал тосгонд дулааны цахилгаан станц барьж, айл өрхүүд, зочид буудлуудыг инженерийн шугам сүлжээнд холбоно
Ажлын байр нэмэгдүүлж, амьдрах орчныг сайжруулна хүрээнд
-Олон төрлийн орон сууцны хангамжийг сайжруулж, айл өрхүүдийг дулааны сүлжээгээр холбоно
-Гэр хорооллын газрыг дахин зохион байгуулж, 1000 төсөл хэрэгжүүлнэ
-Зөвшөөрөл олгогдсон барилгажилт төсөл 800
-Ашиглалтын шаардлага хангахгүй орон сууцуудыг нурааж, шинээр барих төсөл 250
-Шинэ суурьшлийн бүс хөгжүүлэх төсөл 700
-Түрээсийн орон сууц 200-г барьж байгуулна.
-Шаардлагад нийцсэн модны үйлдвэр байгуулна
-Чаргайтын усан цахилгаан станцыг түшиглэн шахмал түлшний үйлдвэр байгуулж, зэргэлдээх аймгуудаа нөөцөөр хангана
-Мөрөн-Архангайн Тариат, Хөвсгөлийн Тосонцэнгэл-Архангайн Өлзийт зэргийг холбосон хэвтээ чиглэлийн аялал жуулчлалын 180 км автозам,
-Ханх-хатгал чиглэлийн 180 км автозам байгуулах зэрэг маш олон томоохон амлалтуудыг өгч байжээ. Харин эдгээр амлалтууд өдгөө биелсэн үү? Уншигч таниас болон эрхэм Боловсролын сайд Л.Энх-Амгалан таниас асууя
Шударга ёсыг нэхэхэд тэргүүн эгнээнд би шударга гэж зогсох ёстой хүний нэг бол Боловсролын сайд байх ёстой. Гэтэл өнөөдөр Боловсролын салбарыг толгойлж, чиглүүлж байгаа хүн өөрөө шударга байж чадаж байна уу?
