Монголын парламентын 9 дэх удаагийн сонгууль дэлхий нийтийн анхааралд байна

Газар зүйн хувьд ОХУ, БНХАУ гэсэн авторитар дэглэмтэй хоёр том их гүрний дунд оршдог Монгол Улсыг барууныхан “Ардчиллын баянбүрд” хэмээн тодорхойлдог билээ. Түүнчлэн ардчилсан Монгол Улсын сонгууль олон улсын байгууллагууд, ажиглагчдын анхаарлын төвд байсаар ирсэн.

Тэгвэл өнөөдөр /2024.05.22/ Сонгуулийн ерөнхий хорооны дарга П.Дэлгэрнаран Европын аюулгүй байдал хамтын ажиллагааны байгууллагын /ЕАБХАБ/ Ардчилсан институт хүний эрхийн газраас Монгол Улсын Их Хурлын 2024 оны ээлжит сонгуулийг ажиглах Хорооны тэргүүн Элчин сайд Жэннифер Браш болон бусад шинжээч, мэргэжилтнүүдийн төлөөллийг хүлээн авч уулзсан байна.

Тодотгоход, Монгол Улс 2012 онд ЕАБХАБ-ын 57 дахь бүрэн эрхт гишүүнээр элсэн орсон цагаас хойш тус байгууллагын бүх үүрэг амлалт, үүний дотор ардчилсан сонгуультай холбоотой амлалтуудыг биелүүлэх үүрэг хүлээх болсон билээ. Түүнчлэн үүргээ амжилттай биелүүлсээр ирсэн. Тухайлбал, Монгол Улсын Ерөнхийлөгчийн 2013, 2017, 2021 оны сонгууль, Улсын Их Хурлын 2016, 2020 оны сонгуулийг ЕАБХАБ-ын гишүүн орнууд, Европын Парламент болон ЕАБХАБ-ын Парламентын Ассамблейн төлөөллөөс бүрдсэн 300-400 гаруй ажиглагчтай багийг тогтмол илгээн ажиглаж, хамтран ажилласан уламжлалтай юм. Түүнчлэн уламжлалын дагуу Монгол Улсын Их Хурлын 2024 оны ээлжит сонгуулийг олон улсын төлөөллөөс бүрдсэн өргөн бүрэлдэхүүнтэйгээр ажиглахаар ирсэн Ардчилсан институт хүний эрхийн газрын төлөөлөгчдөд Сонгуулийн ерөнхий хорооны дарга П.Дэлгэрнаран уулзалтын эхэнд талархал илэрхийлсэн байна.

Энэ удаагийн уулзалтаар сонгуулийн хууль тогтоомжийн хэрэгжилт, улс төрийн болон сонгуулийн сурталчилгааны санхүүжилт, зөрчил, маргааны шийдвэрлэлт, нэр дэвшигчдийн бүртгэл, цахим сурталчилгаанд тавих хяналт, сонгуулийн үйл ажиллагааны зохион байгуулалт, бусад төрийн байгууллагын оролцоо, технологийн ашиглалт, хэвлэл мэдээлэл, хууль эрх зүйн шинэчлэгдсэн зохицуулалттай холбоотой мэдээлэл солилцжээ. Европын аюулгүй байдал хамтын ажиллагааны байгууллага (ЕАБХАБ)-ын Ардчилсан институт хүний эрхийн газраас Монгол Улсын Их Хурлын 2024 оны ээлжит сонгуулийн үйл ажиллагааг ажиглах олон улсын шинжээч, мэргэжилтнүүдээс бүрдсэн өргөн бүрэлдэхүүнтэйгээр ажиглахаар төлөвлөн хороо байгуулжээ. Сонгууль ажиглах хороо Улаанбаатар хотод Төлөөлөгчийн газраа албан ёсоор нээсэн байна. Үндсэн багийн гишүүд болох 11 шинжээч, мэргэжилтнээс бүрдсэн тус төлөөлөгчийн газрыг Элчин Сайд Женнифер Браш удирдах аж. Түүнчлэн тэргүүн дэд даргаар Бүгд Найрамдах Серби Улсаас Ранко Вучэвик, улс төрийн шинжээчээр Унгар улсаас Жулиа Манчин, хуулийн шинжээчээр Бүгд Найрамдах Грек Улсаас Мариана Скопа, Бүгд Найрамдах Болгар Улсаас Ваня Ангуэлова, хэвлэл мэдээллийн шинжээчээр Бүгд Найрамдах Словак Улсаас Иван Годарски нар ажиллахаар ирснийг танилцуулжээ.

Ардчилсан институт хүний эрхийн газраас тавдугаар сарын 28-аас эхлэн аймгуудаар урт хугацааны ажиглагчдыг томилж ажиллуулах аж. Түүнчлэн ээлжит сонгуулийн санал авах өдрөөс өмнө 250 ажиглагчийг богино хугацаагаар ирүүлж ажиллуулахаар гишүүн орнуудад хүсэлт явуулснаа багийн ахлагч мэдээлжээ. Сонгууль ажиглах хорооны ажиглагчид нийслэл, орон нутаг дахь сонгуулийн үйл явцыг ажиглан олон улсын шаардлага, ардчилсан сонгуулийн зарчим, үндэсний хууль тогтоомжид нийцэж байгаа эсэхэд тайлан бэлтгэж, дүгнэлт, зөвлөмж өгөх юм байна. Ардчилсан институт хүний эрхийн газрын Сонгууль ажиглах хороо нь сонгуулийн үйл ажиллагааг эрх зүйн орчин, зохион байгуулалт зэрэг өргөн утгаар ажиглахаас санал авах байруудын бэлтгэл ажил, санал авах өдрийн нээлт, санал хураалт, санал тооллогын үйл явц, хяналтын тооллогыг ажиглана. Сонгуулийн дараагийн өдөр урьдчилсан тайлангаа танилцуулж, сонгуулийн үйл явцыг бүхэлд нь үнэлсэн урьдчилсан тайланг зөвлөмжийн хамт сонгуулийн үйл явц дууссанаас хойш хоёр сарын дараа нийтлэх юм байна.

Tumen.mn

АН-ын Улс төрийн зөвлөл хуралдаж ЕНБД Э.Одбаярыг яаралтай чөлөөлөх нь зүйтэй гэж үзжээ
АН-ын Улс төрийн зөвлөл хуралдаж ЕНБД Э.Одбаярыг яаралтай чөлөөлөх нь зүйтэй гэж үзжээ
 
Нэр дэвшигч Б.Цогтгэрэл Сэлэнгэ аймгийн Мандал сумын Ган замчидтайгаа уулзалт хийж, мөрийн хөтөлбөрөө танилцууллаа
Нэр дэвшигч Б.Цогтгэрэл Сэлэнгэ аймгийн Мандал сумын Ган замчидтайгаа уулзалт хийж, мөрийн хөтөлбөрөө танилцууллаа