Төрийн эрх мэдлийг үнэмлэхүй олноороо хэрэгжүүлж буй МАН өнгөрсөн 8 жилд энэ улс орныг хөгжлийн зөв голдирол руу чиглүүлж чадсан уу гэдгийг тухайлан авч үзвэл их олон зүйлийг өгүүлэх хэрэгтэй болно. Тулгамдсан олон асуудлуудыг тодорхойлох, томъёолох тал дээр алхмууд хийсэн ч хэрэгжүүлэх, хөрсөн дээр буулгах чиглэлд бол тун учир дутагдалтай. Эсрэгээрээ өнгөрсөн жилүүдэд МАН доторх бүлэглэлүүд, эрх ашгуудын толхилцоон илүүтэй ширүүссэн буюу тогооны асуудлуудаа тойрсон хандлага давамгайлсан нь үгүйсгэх аргагүй бодитой байв.
Ямартаа л сонгууль хаяанд ирсэн энэ өдрүүдэд Д.Амарбаясгалан, Д.Сумъяабазар нарын толхилцоон эрчимээ хадгалсан хэвээр байна. Өнөөдрийн тухайд, А нь нэр дэвшихээр болж С нь мандатгүй хоцорсон ч, тэд бие бие рүүгээ довтолсон, тэлчилсэн хэвээрээ л байна. Нүүрс, Ногоон автобус зэрэг нийгмийн анхаарлыг татсан асуудлуудад хэн хэн нь нэр холбогдсон ч хэн хэн рүүгээ л бурууг чихээд тайлбар тавиад байдаг хоёр л доо. Тэрчлэн энэ хэрээрээ сонгуулийн өмнө намаа муухай харагдуулж байна, тэд. "Улс төрд мөнхийн дайсан үгүй, бас нөхөр үгүй" гэдэгчлэн тэдэнд эвтэй явсан үе бий. Гэвч хотын МАН-ын хороо, мэрийн суудал булаацалдсан тэдний тэмцэл буглаж бугшсаар өнөөдрийг хүрчээ. Сануулахад, Д.Сумъяабазар өнгөрөгч оны аравдугаар сард хотын захирагчийн суудлаас буух үедээ, Нийслэлийн МАН-ын хороог би өөрөө босгож авсан юм, Д.Амарбаясгалангаас 2020 оны сонгуулиар нийслэл тус аваагүй гэх зэргээр байр сууриа илэрхийлсэн. Мөн өөрийг нь буулгахад хүргэсэн ногоон автобусны хэрэг явдлыг Д.Амарбаясгалан руу чиглүүлж хэлж ярьсан билээ. Гэхдээ тэгээд ногоон автобусны сонсгол нэртэй хэдэн өдрийн арга хэмжээнээс хотын экс дарга тойроод зугтаачихсан. Уг нь тэрбээр телевизийн ярилцлагад оролцохдоо, автобусны хэргийг Д.Амарбаясгалантай дахиад л холбож ярьсан л даа. Харин Д.Амарбаясгалан хэвлэлийнхэнд байр сууриа илэрхийлэхдээ, Тэр асуудлаараа телевизийн ярилцлагад орж байна лээ. Нэг зүйл байгаа, яриаг нь сонсоод нар баруунаас мандах нь дээ л гэж бодсон. Нүдийг нь боож, чихийг нь бөглөж, гарыг нь барьж байгаад тендер зарлаад хуучин автобус авчирч өгсөн болгох гэж байна. Өөрөө бүдэрсэн хүүхэд уйлдаггүй юм даа гэдэг үгийг л хариулт болгож хэлье дээ" гэсэн юм. Д.Амарбаясгалангийн тухайд, нүүрсний хэрэгтэй нэр нь байнга холбогддог ч, "намайг гүтгэж байна" гэх л хариулт өгдөг. Тэгсэн хэрнээ нүүрсний сонсголоос бас л зугтсан. Түүний талаар гаднын хэвлэлүүдээр гарсан мэдээллийн ард экс мэр байгаа гэх бор шувуу нисдэг. Ерөнхийдөө нэг зүйл тодорхой байгаа нь, Д.Амарбаясгалан ч Д.Сумъяабазар ч сонсголоос учиргүй зугтдаг. Тэр ч утгаараа тэдний толхилцоон МАН-ыг бохир харагдуулсаар өнөөдрийг хүрэв.
Tumen.mn
