Бүгд найрамдах намын дарга "Буян"-гийн хэмээх тодотголтой Б.Жаргалсайхан сонгууль өнжиж үзээгүй цор ганц нэр дэвшигч юм. Тэрбээр УИХ-ын болон МУ-н ерөнхийлөгчийн сонгуульд ч хүч үзсээр ирсэн.
Б.Жаргалсайхан энэ тухайгаа өөрөө нүүр номондоо ийн тайлбарласныг бүрэн эхээр нь нийтэлж байна.
" Би Базарсадын ЖАРГАЛСАЙХАН байна. Эрхүү хотын Политехникийн дээд сургуулийг сансрын физикч мэргэжлээр төгссөн. Шинжлэх ухаанд суурилсан улсын хөгжлийг судалдаг, өнөөгийн түвшнээс яаж тэдэн шиг хурдан хөгжиж иргэд баян болохыг бүрэн зураглалаар нь хардаг улс төрч, бас бизнесмен.
1990 оны 9 дүгээр сарын 13-нд Улсын Бага Хурлын анхдугаар чуулган үйл ажиллагаагаа эхэлснээр манай оронд байнгын ажиллагаатай Парламент хэмээх төрийн байгууллын шинэ тогтолцоо бүрэлдэн тогтож, эдүгээ 35 жил болж байна. Ардчиллын цонхыг анх нээгчдийн нэг боловч өөрийн үзэл баримтлалд эдүгээг хүртэл үнэнчээр яваа нэгэн.
Анх 30 настайгаасаа эхлээд өнөөдөр монголын сонгуулийн түүхэнд нийт 9 удаагийн сонгуульд тасралтгүй нэр дэвшиж байгаа цорын ганц нэр дэвшигч. Дунд нь нэг удаа парламентын гишүүн, сөрөг хүчин болохдоо үйлдвэр худалдааны сайдаар ажилласан богино хугацаандаа та юу амжуулсан бэ гэж олон хүн ам асуудаг. Тэр богино хугацаанд төр, ард түмний төлөө олон ажил хийсэн. Жишээ нь Төмөртэй, төмөртолгойн ордуудын лицензийг улс төрчид хуйвалдан Хятадуудад өгсөн байсныг буцаан авч Дарханы Төмөрлөгийн үйлдвэрт өгсөн нь өнөөдөр дөнгөж 3%-ийг нь ашиглаж эхэлж байгаа энэ том ордууд. Мөн Эрдэнэтийн хажууд улс төрчдийн лоббигоор Хятадууд зэс молибдений уурхай барих гэж байсныг таслан зогсоож Эрдэнэт үйлдвэрийн харъяанд өгсөнөөр монгол төрийн саалийн үнээний нөөц дахин 40 жилээр сунгагдсан юм.
Тухайн үед бүх гишүүд тойргоороо явж халуун сав, гурил будаа тарааж байхад би тэднийг шүүмжилж ганцаараа тэгж яваагүй болохоор намайг сайд байхдаа чи юу хийсэн юм бэ гэж хүмүүс асуудаг юм.Сонгогчдын мэлмий нээгдэж байгаа энэ цаг үед төрийн сонгуульдаа ахин нэг удаа нэр дэвшиж байна. Би үзэл бодлоосоо ухраагүй Бүгд Найрамдах Намын Б.Жаргалсайхан байна. Чингэлтэй, Сүхбаатар дүүрэгт нөгөө л хүмүүстэй чинь ахин өрсөлдөж байгаа шүү".
