МАН-ын дарга, Монгол Улсын Ерөнхий сайд Л.Оюун-Эрдэнэ Сонгинохайрхан дүүргийн иргэд сонгогчидтой уулзлаа.
Үндсэн хуульд өөрчлөлт оруулж, холимог тогтолцоонд шилжсэнээр Монгол Улс анх удаа 126 гишүүнтэй парламенттай болж, нийгмийн төлөөлөл нэмэгдэх боломж бүрдсэн. Тийм ч учраас МАН ээлжит сонгуульд улстөрчдийг тойрогт өрсөлдүүлж, мэргэжлийн экспертүүдийг жагсаалтад багтаасан нь шинэ хүмүүст боломж олгосон гээд МАН-аас жагсаалтад нэр дэвшигчид улс төрд шинэ шийдэл, зарчим, соёлыг бий болгоно гэдгийг онцолсон.
Энэ ч үүднээс Хот төлөвлөгч, архитектор, доктор Г.Лувсанжамц, Австралийн Middleton group-ийн Эрчим хүчний ахлах инженер, доктор М.Энхцэцэг, Анагаахын Шинжлэх Ухааны Үндэсний Их Сургуулийн багш О.Саранчулуун нарыг жагсаалтын эхэнд эрэмбэлсэн нь улс орны хэтийн хөгжилд чухал ач холбогдолтой сонголт байсан гэдгээ хэлэх үед Сонгинохайрханчууд нижигнэсэн алга ташилтаар хүлээн авсан юм.
Мөн МАН-ын даргаасаа эхлээд чадвартай, боловсролтой, туршлагатай улстөрчид нь бусад намын дарга шиг жагсаалтын ард нуугдалгүй тойрогт нэр дэвшин өрсөлдөж байгааг ч цугласан олон талархалтай хүлээн авч байлаа.
Сонгинохайрхан дүүрэгт нэр дэвшиж буй “Хөгжлийн 5”-г МАН-ын дарга, Монгол Улсын Ерөнхий сайд Л.Оюун-Эрдэнэ танилцуулсан юм.
Энэ үеэр тэрбээр “СХД-ийн том төслүүдэд хамгийн том хувь нэмэр оруулж болох хүн бол Соёлын сайд Ч.Номин. Хамгийн ажил хэрэгч сайдаа СХД-т илгээх нь зүйтэй гэж үзсэн. Энэ утгаараа манай шинэ үеийн шилдэг залуу лидерүүдийн нэг Ч.Номинг СХД-т дэвшүүлсэн. Ч.Номин Олон улсын авлигын эсрэг байгууллагатай ажиллах ажлын хэсгийг өнгөрсөн гурван жилийн хугацаанд ахалж ажилласан. Өнөөдөр Монгол Улс системийн авлигын эсрэг хүчтэй тэмцэж чадаж байгаагаа ойлгуулсан. Лаост болсон олон улсын хурал дээр Олон улсын авлигын эсрэг байгууллагын удирдлагууд Монгол Улсад баяр хүргэж, уулзсан. Энэ бүх холбоосыг Ч.Номин сайд хийж байгаа. Тиймээс авлигын том систем дээр олон улсын том туршлага нь хувь нэмэр болно гэж бодсон миний сонголт зөв байсан. Авлигатай тэмцэхээр олон дайралт ирдэг. Гэхдээ цаг хугацаа Ч.Номинг хэн бэ гэдгийг өдрөөс өдөрт Монголын нийгэмд ойлгуулах болно.
Мөн Ч.Номин сайн продюсер. Тиймээс аялал жуулчлал, соёлын бүтээлч үйлдвэрлэлийг Монголд хийж чадах бэлтгэгдсэн лидер Монголд цөөхөн. Тиймээс СХД-ийг ногоон байгууламжаа хөгжүүлж, соёл, аялал жуулчлалын дүүрэг болоосой гэж, соёл бол тусгаар тогтнолын үзэл санаа гэдгийг ойлгуулаасай гэж соёлын сайд СХД-т хамгийн зохих нэр дэвшигч гэж үзээд Ч.Номинг дэвшүүлсэн. Ийм л авьяаслаг, залуу сайдаа, авлигын эсрэг тууштай зогссон үзэл санааг нь дэмжиж, эмэгтэйчүүдийн тод төлөөлөл гэдгээр нь, шинэ 30 жилийг эхлүүлж, төр, хувийн хэвшлийн түншлэлийг сайн хийж чадна гэдэг агуулгаар нь Соёлын сайд Ч.Номинг дэмжээрэй” хэмээн онцоллоо.
