УИХ-ын ээлжит сонгууль 69.85 хувийн ирцтэй амжилттай зохион байгуулагдаж, өнөөдөр 13 тойрогт ялалт байгуулсан нэр дэвшичгид болон намын жагсаалтаар нэр дэвшсэн 48 нэр дэвшигчийг УИХ-ын гишүүн болсонд тооцож, Сонгуулийн ерөнхий хорооноос үнэмлэх гардуулан өгөв.

Энэ удаагийн сонгуульд Үндсэн хуульд оруулсан нэмэлт өөрчлөлтийн дагуу анх удаа 126 гишүүнийг сонгох сонгуулийг хосолсон тогтолцоогоор зохион байгуулсан нь сонгууль зохион байгуулалтын хувьд болоод эрх зүйн орчны хувьд өргөн цар хүрээг хамарсан онцлог сонгууль болсон. Нөгөө талаар сонгууль ямар нэгэн маргаангүй тайван өрнөж өндөрлөсөн гэхэд болно.

Тэгэхээр УИХ-ын ээлжит сонгууль нь Үндсэн хууль, УИХ-ын тухай хууль болон бусад хууль тогтоомжид бүрэн нийцэж хуулийн дагуу хүчин төгөлдөр зохион байгуулагдсан гэсэн үг. Анх удаа хуулийн томоохон өөрчлөлтийн дагуу 126 гишүүнтэй, холимог тогтолцоогоор зохион байгуулагдсан гэхэд Сонгуулийн ерөнхий хороо болон бусад холбогдох байгууллагууд ямар нэг алдаа гаргалгүй чамбай ажиллалаа гэдгийг ажиглагч, түмэн олон хэлж байна.

Мөн үүний дараа Ерөнхийлөгч У.Хүрэлсүх УИХ-ын ээлжит сонгуульд суудал авсан нам, эвслийн удирдлагыг хүлээн авч уулзаж, УИХ-ын Анхдугаар чуулганыг товлон зарлах өдрийг зөвшилцсөн. Энэ үеэр Ерөнхийлөгч УИХ-ын ес дэх удаагийн ээлжит сонгууль нь Үндсэн хуульд оруулсан нэмэлт, өөрчлөлтийн дагуу анх удаа 126 гишүүнийг хосолсон тогтолцоогоор сонгосон онцлогтой болсныг дурдав. Тэрбээр 2024-2028 оны парламент нь олон намын төлөөлөл, ард түмний төлөөлөл, хамгийн олон эмэгтэй гишүүдээс бүрдэж чадсаныг тэмдэглэлээ.

Мөн УИХ-ын ээлжит сонгуульд суудал авсан нам, эвслүүд сонгуулийн үеэр өрнөсөн маргаан, талцлыг умартаж, улс орны нийтлэг эрх ашгийн төлөө нэгдмэл байж, ажлаа хийх цаг ирснийг сануулаад Монгол Улсын тусгаар тогтнол, аюулгүй байдал, үндэсний эв нэгдлийг хангах, хамгаалахын төлөө харилцан ойлголцлыг чухалчилж, урагшаа харж ажиллахыг захилаа.

Tumen.mn