АНУ-ын тавьсан хоёрдогч эдийн засгийн хоригийн улмаас Орос-Хятадын хамтарсан нүүрсний төсөлд санхүүжилтийн бэрхшээл тулгараад байгааг En+ компанийн гүйцэтгэх захирал өчигдөр мэдээлжээ.
АНУ-ын засаг захиргаа энэ оны зургаадугаар сард ОХУ-ын эсрэг хоёрдогч эдийн засгийн хориг зарласнаар тус улсын сангийн яам Оростой бизнесийн харилцаа үүсгэсэн гадаадын банкуудыг шийтгэх эрхтэй болсон юм.
Өвөр Байгалын бүс нутаг дахь хамгийн том нүүрсний нөөц болох Зашуланскийн ордыг Оросын металл, сэргээгдэх эрчим хүчний томоохон компани En+ болон Хятадын China Energy Investment Corporation компаниудын тавь, тавин хувийн оролцоотой Разрезуголь компани эзэмшдэг.
“Энэ чуулганд оролцож буй зорилго маань одоо тулгараад байгаа бүх асуудлуудыг шийдвэрлэж, төслийн хэрэгжилтийг хурдасгах юм. Тулгарсан асуудлууд нь санхүүжилт, санхүүгийн нөөцийг ашиглахтай холбоотой. Мэдээж энэ нь хориг арга хэмжээний нөлөө. Төслийн удаашралд манай Хятадын түншүүдийн санаа зовж байгаа” гэж En+ компанийн гүйцэтгэх захирал Владимир Колмогоров өчигдөр Владивосток хотод болж буй Дорнын Эдийн Засгийн Чуулганы үеэр ярьжээ.
Разрезуголь компани Зашуланскийн ордын лицензийг 2013 онд авч байсан юм.
Тухайн үед Хятадын тал 724 сая тонны тогтоогдсон нөөцтэй уг төслийг “Хятад-Оросын нүүрсний салбарын хамтын ажиллагааг хөгжүүлэхэд чиглэсэн чухал алхам” гэж магтаж байжээ.
Гэвч үүний дараа коксжих нүүрсний үнэ ханш унаснаас Хятадын талын сонирхол буурч, төсөл хэсэг хугацаанд саатсан байна.
Талууд 2021 онд төслийг сэргээж, 2027 оны сүүлчээр жил бүр 5 сая тонн коксжих нүүрс олборлодог болох төлөвлөгөөг 2023 онд баталж байжээ.
2024 оны дөрөвдүгээр сард En+ компани Зашуланскийн төсөлд 50 тэрбум рублийн ($557.8 сая) хөрөнгө оруулах төлөвлөгөөг зарлаж байв.
Энэ хөрөнгөөр нүүрсний уурхай, дэд бүтэц, төмөр зам, авто зам барих, машин механизм худалдаж авахаар төлөвлөж байжээ.
Колмогоровын ярьснаас үзвэл АНУ-ын хоёрдогч хориг арга хэмжээний улмаас уг төлөвлөгөөнд бэрхшээл тулгарсан бололтой.
Эх сурвалж: RBC.RU
