Сар хүрэхгүй хугацааны дараа Орон нутгийн сонгууль болох гэж буй. Энэ удаагийн орон нутгийн сонгууль 10 дугаар сарын 11-ний өдөр болох бөгөөд одоогоор сонгуулийн ажиллагаа хуваарьт заасны дагуу явагдаж байна. Тухайлбал хоёр хоногийн өмнө буюу 09 дугаар сарын 12-ны өдөр нэр дэвшигчдийн хүлээж авсан баримт бичгээ шалгаад тухайн шатны сонгуулийн хороод бүртгэх эсэх шийдвэрийг гаргаж байна.
Мөн Бүртгэхээс татгалзсан болон нөхөн нэр дэвших хүмүүс материалаа бүрдүүлэн, зөрчлөө арилгуулах хүсэлт гаргах, цаашилбал нам эвсэл, нэр дэвшигчид хуульд заасан гурван үндэслэлийн дагуу нөхөн нэр дэвшүүлэх харилцаа есдүгээр сарын 16-ны өдөр хүртэл явагдах аж.
Тодруулбал, нөхөн нэр дэвшүүлэх үндэслэл нь тухайн нам эвслээс нэр дэвшүүлэхээр татгалзсан хүний оронд өөр хүнийг нэр дэвшүүлэх, эсвэл тухайн нэр дэвшигч нас барсан, шүүхээр ял шийтгүүлсэн бол тухайн нам эвсэл, тус мандат дээр нөхөн нэр дэвшүүлж болно. Нэр дэвшүүлэхээс татгалзсан хүний хувьд зөрчлөө арилгуулан есдүгээр сарын 16-ны хооронд холбогдох баримт бичгийн хамт сонгуулийн ерөнхий хороонд хандах юм. Үүний дараагаар есдүгээр сарын 26-ны өдөр хүртэл тухайн шатны сонгуулийн хороод бүртгэх эсэх шийдвэрийг гаргаж, бүртгэгдсэн тохиолдолд нэр дэвшигчдэд үнэмлэх олгож, нийтэд мэдээлнэ.
Орон нутгын сонгууль нь Есдүгээр сарын 26-ны өдрөөс эхлэн сонгуулийн сурталчилгааны ажил эхлэх хууль зүйн зохицуулалттай. Тухайн сурталчилгаа ийн үргэлжилж 10 дугаар сарын 09-ний өдрийн 00.00 цагт дуусгавар болно. Ингээд санал хураалтын ажиллагаа 10 дугаар сарын 11-ний өдөр зохион байгуулагдах товтой байна.
