Эрүүл мэндийн даатгалын газрын дарга Л.Бямбасүрэн болон тус газрын нэхэмжлэлийн хяналтын хэлтсийн дарга А.Төвшин нарыг өнөөдөр АТГ-аас саатуулан шалгаж эхэллээ. Тэднийг АТГ ийнхүү онилон шалгах болсон нь эмнэлгүүдээс хахууль авч, худал бичилт хийж байсан нь тогтоогдсонтой холбоотойг хэвлэлүүд онцолж байна. Хуулийн байгууллагын эх сурвалжууд ч уг мэдээллийг баталгаажуулсан байр суурийг илэрхийлчихээд байна. Л.Бямбасүрэн даргын хувьд уг нь шударга имижийг бүрдүүлж чадсан нэгэн. Тэрбээр Зиндаа сэтгүүлд өгсөн ярилцлагадаа, "Хүний эрүүл мэндийн төлөө, ажлын төлөөх сайхан хамт олонтой ажиллана гэдэг өөрөө их сайхан л даа. Ер нь би ажилласан цаг хугацаагаа эргээд бодоход ихэнхэд нь л нэлээд галтай, цаг хугацаатай уралдан, давчуу ажиллаж ирсэн юм уу даа. Тухайлбал, мэргэжлийн хяналтын байгууллагад 20 шахам жил, эрүүл мэндийн дэд сайдаар дөрвөн жил гээд, ажлын чиг үүрэг маань эрүүл мэндийн салбараас огт хөндийрөөгүй явж дээ. Хүн амынхаа эрүүл мэндийг хамгаалах үйлсэд гар бие оролцож явах хувь тавиландаа баярладаг. Төрд ажиллах хугацаандаа олон сайхан чадварлаг, ажлын төлөө, хүний төлөө гэсэн сэтгэлтэй удирдлага, хамт олонтой ажиллаж ирсэн, ажиллаж байгаа минь л хамгийн бахархууштай тал юм даа." хэмээн өгүүлсэн байдаг. Тэгвэл ийн хэлж ярьж байсан дарга эмэгтэй авлигын асуудлаар шалгагдаж буй нь таагүй асуудал юм. Эрүүл мэндийн даатгалын газрын Хэвлэлийн албаны дарга Т.Амаржаргал сошиал хуудаснаа "Нийгмийн сүлжээнд явж байгаа мэдээллийн талаар тайлбар өгье. ЭМДЕГ-ын дарга Л.Бямбасүрэн шалгагдаж байгаа нь үнэн. Гэхдээ шалгагдлаа гэдэг нь гэм буруутай гэсэн үг биш. Ажил хариуцаж байгаа, байгууллага удирдаж, зовлон жаргал үүрч яваа хүний давдаг л даваа" гэсэн байна. Хэдийгээр ажил хариуцаж буй хүнд алдаа оноо байдаг ч авлига авахыг бол хүлээн зөвшөөрөх боломжгүй л дээ. Улсын, хувийн эмнэлгүүдэд олгодог даатгалын санхүүжилтээс хуурамч бичилт хийх замаар зардлыг нь өсгөж, дундаас нь хувь авдаг байсан нь үнэхээр үнэн бол хуулийн зохих хариуцлагаа хүлээх биз ээ.

Tumen.mn