“Гарьд Магнай” хэмээх гайхамшигтай сайхан зохиолтой уран сайхны киног манайхан юу эс андах билээ. Тэрхүү кинонд эрх хатны бөхийг олны өмнө хоёр ч удаа шидсэнийхээ төлөө төрийн наадам үймүүлсэнд тооцогдож, хүрээний төв гудамжинд чулуугаар нүүлгүүлж буй нэгэн гардаг. Бас болоогүй ээ, нүүлгүүлэхдээ сэтгэлтэй эмэгтэйгээ энгэртээ хамгаална. Өөрөөр хэлбэл, хоёулан руу чулуу шиддэг. Тэгж хүрээний гудманд духаа цоолуулж зогсоход нь хэсэг ардууд авраад “Энэ ч дээрээс шидсэн чулуу байх аа” хэмээдэг дээ. Одоо яг энэ киноны яг энэ хэсгийн үйл явдал орчин үед өрнөж байна.

Шилэн Цогоог төрсөн эмэгтэй дүүтэй нь сошиал, хэвлэлийн бохир гудамжнаа чирж аваачиж байгаад, олны танигдаж, түмнээ өргөмжлөгдсөн Шилэн чанарыг нь хага цохих гэж байгаа л хэрэг. Ердөө л энэ. Харин тэр дээрээс чулуу шиддэг хүн гуай хэн бол? Ганц тоон дээр ч биш хэд хэдэн дарга сайд байх боломж бүрэн бий. 30 гаруйхан настай эмэгтэй дүүг нь 20 гаруй автомашинтай гэж шүүмжилжээ. Ямар хуучны ховор эдлэл цуглуулагч биш дээ, 1990-ээд оны сүүлч, 2000-аад оны эхээр үйлдвэрлэгдэж, одоо Утаатбаатарын гудамжинд үзэгдэхээ бараг больсон үлэг гүрвэлтэй нас чацуу автомашинуудыг залуухан бүсгүй авч, цуглуулаад байдаг гэхээр нэг л авцалдахгүй байгаа биз. Хүмүүс нэгнээ муулахаараа бүр хажуугаар нь өнгөрсөн бүхнийг амраг нь болгож, хаягдаж төмөр болсныг хүртэл машин нь болгож хардаг байх л доо.

Өөр өөлж баалах юм байхгүй болохоор Зам, Тээврийн яаманд Шилэн Цогоо байсан юм чинь үүгээр нь оролдоод үзье гээд үлгэр зохиож. Түүнийг бид уншиж, Монголын нэг бор өдрийг бухимдуухан өнгөрүүлнэ. Зүрхэнд нь нар, тархинд нь боловсрол, ирээдүйд нь гэрэл өгөхгүй хэрнээ бор өдрийг бодох юу нь яг дэргэд яваа нэгнийг нохойд хаяж өгдөг хуучны арга шууд эндээс ханхална.

Ер нь яагаад Шилэн Цогоогоос Шилэн гэх тодотголыг нь салгаж, төрсөн дүүг нь ажил албанаас нь холдуулчих гээд хэдэн сайт, сошиал хуудсуудаар ноцуулна вэ? Их энгийн Шилэн гэх тодотголыг өөр нэгэн авч, дүүгийнх нь албан тушаалыг мөн өөр нэгэн эзэмшихээр улайрч байгаа хэрэг. Улай үзэхээр улангасч суугаа хэрэг. Өдөр өнгөрөх тусам энэ байдал үнэнд ойртож, хүмүүс мэдэрч эхэлнэ. Шилэн Цогоо сүүлийн үед хэнтэй үзэлцлээ? Аан тийн, асар баян Хөдөлмөрийн баатарын танхил охин Монголын төрийн нэгэн сайдтай шүү дээ. Төрийн том төсөл танилцуулгыг өөрийн шахуу тансаг буудалдаа 50 саяар тансаглан байж танилцуулцацгаасан явдлыг задлан тавьсан. Төрийн байгууллага хотоор дүүрэн байхад өөр хуралдах газар огтоос олдоогүй болохоор аяга хоолныхоо 50 сая төгрөгөөр тэгж нэг хуралдуулж, хуйлралдуулж билээ. Бас хүүхдэд кино жүжиг үзүүлнэ гээд төсөвт тоймгүй их мөнгө суулгах гээд байгаад нь хэсэгчилж хориг тавихыг Ерөнхийлөгч У.Хүрэлсүхээс хүссэн.

Ер нь тэгээд Шилэн Цогоогийн шилээ хийж суугаад ухаж гаргаж тавьсан баримтууд нь уурлуулсан сайд дарга нар захаас аваад зайдалчихсан дээр сууж байгаа доо. Өөрөө мань хүн болж буй явдалд ямар хариулт өгсөн бол гэж харлаа. “Дүүгийнх нь ажлыг авахын тулд ахыг нь балбах Миний төрсөн дүү болж төрсөнөөрөө Цэнхэр дугаараар машинаа хураалгасан дарга нар, Тендерээ цуцлуулсан захиралуудад их сайхан уураа гаргах мешёк болж байх шиг Дүү минь 3 жилийн өмнө нөхөрт гарсаан. Нөхрийн хөрөнгийг нэг өдөр нэмж бичхээр өссөн харагдах нь аргагүй. Гаалийн ажилтан Б хөдөө явж ажиллахгүй гэж ажлаасаа гарсан. Нэг өдөр буцаж ирээд Шилэн Цогоогийн дүүгийн ажлыг өг өгөхгүй бол Хэвлэлээр нүднэ гэждээ...Нэгнийхээ ажлыг авах гэж нөгөөг хэвлэлээр нүдэх... Ахаар нь барьцаалах гэж сүрдүүлж заналхийлэх... Булли хийх Ах нь олон дарга захирал Төсөв сааж амьдардаг гаруудын амжиргааг тасалдуулсан өс хонзон. За нэг ийм л юм болж байна” хэмээн Шилэн Цогоо шилэн байдлаа баттай хадгалан өгүүлжээ.

Үүнийг уншаад та бүхэн төрсөн дүү охиныг нь гурван жилийн өмнө нөхөрт гараагүй байсан нь дээр байж дээ гэж бодож байвал бидний бодол ижил байна аа.

Tumen.mn