Нийслэлийн Засаг даргын орлогч Т.Даваадалай тэргүүтэй чулуу үйлдвэрлэгчид болон ТАСО компаниас явган замын ажилтай холбоотой мэдээлэл өглөө.

Нийслэлийн засаг даргын нэгдүгээр орлогч Т.Даваадалай "Бид дотоодын үйлдвэрлэлээ дэмжиж, энэ компанийн дөрвөн см зузаан, 60х30 хэмжээтэй хавтанг сонгосон. Гэхдээ хатуу чулуу тул хагарна. Цементэн бордюр хурдан эмтэрдэг тул насжилт урт гээд чулуун бордюр тавьж байна. НЗДТГ Монголын чулуу үйлдвэрлэгчдийн холбоотой хамтран ажилладаг. Халтирдаггүй чулуу гэж байхгүй, цас ороход бүгд халтирна. Гэхдээ шатаах аргаар барзайлгасан чулууг явган хүний зам дээр тавьж байна. Дор хаяж 20-30 жилийн насжилттай. Иргэд явган замыг шинэчилж байгааг маш их шүүмжилж байна. Их элэгдсэн, хагарсан, эвдэрсэн, энд тэндээ цөмөрчихсөн замыг засаж байна" хэмээлээ.

Мөн тэрбээр "Хичээлийн шинэ жилээс өмнө зам засварын ажлыг эрчимжүүлж ажиллаж байна. Энэ талаар болон өнгөрсөн хугацаанд гарч буй зарим буруу ташаа мэдээлэл, тодорхойгүй гүтгэлгүүдэд тайлбар өгье. Явган замыг байгалийн чулуугаар хийж буйг төсвийн мөнгө үрлээ, хэрэггүй бүтээн байгуулалт, хятадуудыг дэмжлээ гэх мэтээр гүтгэж байна.

2025 оны Нийслэлийн төлөвлөгөөнд явган замыг чулуун зам байхаар тогтсон. Үүнд 58 км урт, 215 мянган метр талбайг 15 төсөл болгож хуваан, 65.3 тэрбум төгрөгийн төсөвтэйгөөр төлөвлөсөн. Үүний дагуу гэрээ, тендерийг зарлаж өнөөдрийн байдлаар 13 төсөл арга хэмжээг гүйцэтгэгчийг шалгаруулж 58 тэрбум төгрөгийг өртөгтэй 54,2 км урт явган замын ажил эхлүүлээд, тендерт шалгарсан 13 компани тус ажлыг 35 хувийг нь одоогоор гүйцэтгэж байна. Улаанбаатар хотын гол зам болох Энхтайваны өргөн чөлөөн, Их, Бага тойруу, Олимпын гудамж, Чингисийн өргөн чөлөө гэх мэт гол замуудаа чулуун хавтангаар тохижуулахаар төлөвлөсөн.

Гүйцэтгэгч компаниуд нь бүгд монголынх ба тендерийн журмын дагуу шалгарсан. Жишээ нь "ТАСО" ХХК нь 26 мянган м.кв Зүүн 4 замаас Саппоро хүртэлх замыг засаж байна. 2023 оны аравдугаар сард Х.Нямбаатар Нийслэлийн Засаг дарга болоод даруй 4 өдрийн дараа Монголын Үндэсний чулуу үйлдвэрлэгчидтэй уулзаж, замаа чулуугаар хийхээ танилцуулсан ба батлан даалтын сангаар дамжуулж төслөө хэрэгжүүлэхээр болсон.

Явган замын бүтээн байгуулалт хийж буй компаниуд өөр өөрсдийн худалдан авалтын журмын дагуу санал болгож буй компаниудаасаа бүтээгдэхүүнээ авч байгаа байх, зарим нь мэдээж Хятадаас авч байгааг үгүйсгэхгүй. Гэхдээ бодлогын хэмжээнд монгол чулуугаа авахыг тэдэнд уриалан, үе шаттай уулзалтуудыг хийн, дэмжиж байна. Хуулсан замыг ангилж ялгаад сайныг нь дүүргүүдэд хүлээлгэн өгч, дахин ашиглана. Үр ашиггүй хаяж байгаа зам нэг ч байхгүй" хэмээлээ.

Чулуу үйлдвэрлэгч холбооны гишүүн, "ТАСО" ХХК-ийн захирал Т.Отгонбаяр:
Нийслэлийн Засаг дарга Х.Нямбаатар даргатай уулзахдаа олон улсад хийсэн судалгаануудаа дэлгэцээр танилцуулсан. Бидэнд "Чулуу үйлдвэрлэгчдээ дэмжинэ, хот ийм стратеги, бодлоготой болж байгаа, үүнд нийцсэн стандартын замыг та бүхнээс хүлээж авна" гэдгээ илэрхийлсэн. Тэгээд батлан даалтын сангаар дамжуулаад чулуу үйлдвэрлэгч бүх компанийг зээл авах боломжоор хангасан. Хүү нь арилжааны банкнаас 2 дахин хямд, үйлдвэрлэлийг дэмжих зээл 9,3 хувийн хүүтэй зээл санал болгосон. Хүсэлт өгсөн компаниудын зарим нь бүтээгүй ч, бүтсэнүүд нь техник технологио шинэчилж чадсан. Манайх ч мөн ялгаагүй шалгарч, зээлээ сар бүр төлж, үйлдвэрлэлээ өргөжүүлээд явж байна. Хүн мэдэхгүй зүйлийнхээ дайсан гэдэг дээ. Иргэдийн зүгээс яагаад шүүмжлээд байгааг би ойлгохгүй байна. Үндэсний бүтээн байгуулалтад чимээгүй хувь нэмрээ оруулж, үндэсний татвар төлөгч байсаар ирсэн. Манайх 2024 онд тендерт оролцоод Зүүн 4 замаас Саппоро хүртэлх явган хүний замыг засаж тохижуулахаар болсон. Дэмжиж байгаа нэг хэсэг нь байхад харлуулах гэсэн нь ч байдаг юм байна.