Монгол Улсын Ерөнхийлөгч У.Хүрэлсүх Ерөнхий сайдыг огцруулсан УИХ-ын тогтоолд бүхэлд нь хориг тавив. Ерөнхийлөгч хориг тавих болсон үндэслэлээ "УИХ-ын чуулганы хүчин төгөлдөр ирц бүрдээгүй байхад нэгдсэн хуралдааныг сунган хуралдуулж, шийдвэр гаргасан. Ерөнхий сайдыг огцруулах асуудлыг хэлэлцэхдээ УИХ-ын гишүүдийн тавьсан саналаар биш Төрийн байгуулалтын байнгын хорооны “Ерөнхий сайдыг огцруулахыг дэмжээгүй” гэдэг саналын томьёоллоор санал хураалт явуулж шийдвэрлэсэн нь Үндсэн хууль зөрчсөн" хэмээн тайлбарлажээ. Хуульд зааснаар Ерөнхийлөгчийн хоригийг хэлэлцэх хугацаа болон үе шатыг танилцуулъя

Монгол Улсын Их Хурлын дэгийн тухай хуулийн 90 дүгээр зүйлд Ерөнхийлөгчийн хоригийг хэлэлцэх талаар дэлгэрэнгүй заасан байдаг.

90.1.Хууль, тогтоолд Монгол Улсын Ерөнхийлөгч хориг тавьсан бол Улсын Их Хурал хоригийг чуулганы үеэр ажлын 14 өдрийн дотор, чуулганы чөлөө цагт хориг тавьсан бол ээлжит болон ээлжит бус чуулган эхэлснээс хойш 10 хоногийн дотор хэлэлцэн шийдвэрлэж тогтоол батална.

90.2.Монгол Улсын Ерөнхийлөгчийн хоригийг тухайн асуудлыг анх хэлэлцэж санал, дүгнэлт гаргасан холбогдох Байнгын хороо болон Хууль зүйн байнгын хороо хэлэлцэж санал, дүгнэлт гаргана.

90.3.Нэгдсэн хуралдаанд хоригийг Монгол Улсын Ерөнхийлөгч, эсхүл түүний итгэмжлэгдсэн төлөөлөгч танилцуулсны дараа энэ хуулийн 90.2-т заасан Байнгын хорооны санал, дүгнэлтийг сонсоно.

90.4.Байнгын хорооны болон нэгдсэн хуралдаанд гишүүд Монгол Улсын Ерөнхийлөгчийн хориг болон Байнгын хорооны санал, дүгнэлттэй холбогдуулан асуулт асууж, үг хэлж болно.

90.5.Гишүүд энэ хуулийн 90.4-т заасны дагуу үг хэлсний дараа Монгол Улсын Ерөнхийлөгчийн хоригийг хүлээн авах эсэх асуудлаар ил санал хураалт явуулах бөгөөд хэрэв хууль, тогтоолын зарим хэсэгт хориг тавьсан бол тухайн зүйл, хэсэг, заалт нэг бүрээр санал хураалт явуулж дүнг танилцуулах бөгөөд хоригийг шийдвэрлэсэн талаарх Улсын Их Хурлын тогтоол баталсанд тооцно.

90.6.Байнгын хорооны болон нэгдсэн хуралдаанд оролцсон гишүүдийн гуравны хоёр буюу 66.6 хувь нь Монгол Улсын Ерөнхийлөгчийн хоригийг хүлээж аваагүй бол хууль, тогтоол хүчин төгөлдөр үлдэнэ.

90.7.Монгол Улсын Ерөнхийлөгчийн хоригийн талаар Хууль зүйн болон холбогдох Байнгын хорооны санал, дүгнэлт зөрвөл холбогдох Байнгын хорооны саналаар эхэлж санал хураалт явуулна.

90.8.Монгол Улсын Ерөнхийлөгчийн хоригийг хүлээн авсан бол хууль, тогтоолыг бүхэлд нь буюу зарим хэсгийг нь хүчингүй болгох, шаардлагатай гэж үзвэл зохих нэмэлт өөрчлөлт оруулах тухай хууль, тогтоолын төслийг хэлэлцэн баталж болно.

90.9.Монгол Улсын Ерөнхийлөгчийн хоригийг хүлээж авсантай холбогдуулан хууль, тогтоолд нэмэлт, өөрчлөлт оруулах бол тухайн шийдвэрийн төслийг холбогдох Байнгын хороо боловсруулж нэгдсэн хуралдаанд оруулах бөгөөд уг төслийн талаар Засгийн газар, холбогдох бусад байгууллагаас санал авахыг шаардахгүй.

Өөрөөр хэлбэл, өнөөдрөөс хойш ажлын 14 хоногийн дотор УИХ-ын чуулган хуралдаж, хоригийг хүлээн авах эсэхийг шийднэ. Ингэхдээ хуралдаанд оролцон нийт гишүүний гуравны хоёр буюу 66.6 хувь нь хоригийг хүлээн авахыг дэмжихгүй бол Г.Занданшатар Ерөнхий сайдыг албан тушаалаас огцорно. Гэвч хоригийг хэлэлцэж эхлэхээс өмнө буюу энэ сарын 22-ны Лхагва гарагт Үндсэн хуулийн цэцийн их суудлын хуралдаан болж Ерөнхийлөгчийн хориг тавьсан асуудлыг мөн хэлэлцэх юм.