Нийслэлийн онцгой байдлын газарт Онцгой байдлын ерөнхий газрын дэргэдэх Гамшиг судлалын үндэсний хүрээлэн, Дотоод хэргийн их сургуультай хамтран “Гамшигт тэсвэртэй дэд бүтэц” олон улсын эрдэм шинжилгээний хурлыг зохион байгууллаа. Тус хуралдаанд ОХУ, БНХАУ, БНСУ, АНУ, Энэтхэг, Монгол Улсын эрдэмтэн, судлаачид танхим болон цахимаар оролцож, 49 илтгэлээс шүүн тунгаасан, шилдэг 17 илтгэл тавьж, хэлэлцүүлэг өрнүүлсэн юм.

“Гамшигт тэсвэртэй дэд бүтэц” олон улсын эрдэм шинжилгээний хурлыг Шадар сайд Х.Ганхуяг нээж үг хэлсэн бол зочин илтгэгчээр УИХ-ын гишүүн Г.Лувсанжамц оролцож илтгэгчдийн салхийг хагаллаа. Ингээд Онцгой байдлын ерөнхий газрын дэргэдэх Гамшиг судлалын үндэсний хүрээлэнгийн судлаач, доктор, хурандаа П.Чимэдцэрэнгийн илтгэлээр цааш үргэлжилсэн. Хуралдаанд Гамшиг судлалын үндэсний хүрээлэнгийн захирал, генерал Л.Болдбаатар, генерал П.Даш, Т.Бадрал болон Онцгой байдлын ерөнхий газрын удирдлагууд, судлаачид, зочид оролцлоо.

Эрдэм шинжилгээний хурлын үеэр эрдэмтэн мэргэд илтгэлдээ олон шинэ санаа дэвшүүлж, хуралдаан маш үр дүнтэй өрнөж байгааг салбарынхан хэл байв.

Хуралдааны гол зорилго бол гамшигт тэсвэртэй дэд бүтцийг илүү сайжруулан барьж байгуулах, гамшгийн эрсдэлийг бууруулах, гамшгийг тэсвэрлэх чадварыг бэхжүүлэхэд шинжлэх ухааны байгууллага, эрдэмтэн судлаачдын оролцоог нэмэгдүүлэх, гамшигт тэсвэртэй дэд бүтцийг илүү сайжруулан барьж байгуулах, бэхжүүлэх талаарх бусад улс орны туршлага, сургамжаас суралцах, шинжлэх ухаан технологийн байгууллагын хамтын ажиллагааг хөгжүүлэх, эрдэмтэн, судлаачдад мэдлэг, чадвар, туршлагаа харилцан солилцох боломжийг бүрдүүлэх, дэд бүтцийн салбарын бодлого боловсруулагчдад шинжлэх ухаан, эрсдэлд суурилсан шийдвэр гаргахад дэмжлэг үзүүлэх юм.

Тэр тусмаа Монгол орны газарзүй, нийгэм, эдийн засгийн өвөрмөц байдал нь гамшгийн эрсдэлийн онцгой нөхцлийг бүрдүүлж байдаг. Тухайлбал, зуд, их хэмжээний цасан болон мөсөн бүрхүүл тогтох, хүчтэй салхи, шуурга, үер, ой, хээрийн түймэр, ган зэрэг байгалийн аюул жил бүр тохиолдож, хүн амын ахуй амьдрал, улс орны эдийн засаг, тогтвортой хөгжилд сөргөөр нөлөөлдөг. Үүний зэрэгцээ Монгол Улс нь төв Азийн газар хөдлөлтийн өндөр идэвхжилтэй бүс нутагт байрладаг бөгөөд сүүлийн жилүүдэд газар хөдлөлтийн давтамж улам бүр нэмэгдэх болсон. Иймээс гамшгийн эрсдэлийг бууруулах, гамшгийн эрсдэлийг даван туулах чадавхыг бэхжүүлэх нь Монгол Улсын үндэсний сөрөн тэсвэрлэх чадавхыг бэхжүүлэх төр, засгийн бодлого, үйл ажиллагааг чиглүүлэх үндсэн зорилгоо болгох явдал юм.

Ийм цаг үед “Гамшигт тэсвэртэй дэд бүтэц” олон улсын эрдэм шинжилгээний хурлыг зохион байгуулсан нь нүдээ олсон зүйл гэдгийг эрдэмтэн судлаачид төдийгүй иргэд олон нийт үзэж байна.

Tumen.mn