Улаанбаатар хотод орон сууцны түрээсийн үнэ улирал тутам нэмэгдсээр байна.

Хэт замбараагүй үнийн хөөрөгдөл дунд түрээсийн үнэ ч мөн дагаж өссөн бөгөөд Сүхбаатар дүүрэгт хамгийн өндөр буюу гурван өрөө байрны түрээсийн ханш нь 7.5 сая төгрөг байгаа бол Сонгинохайрхан дүүрэгт 3 өрөө орон сууцны түрээсийн үнэ 2.5 сая төгрөг байна.

2025 оны 12-р сар гэхэд өрхийн дундаж орлого 1.9 төгрөг байгааг Үндэсний статистикийн хорооноос танилцуулсан билээ.

Хамгийн түгээмэл түрээслэгддэг хоёр өрөө байрны сарын түрээсийн үнэ өнгөрсөн оны 9-р сард 1.5 сая төгрөгөөс 3.2 сая төгрөг байсан бол өнөөдрийн байдлаар 1.9 сая төгрөгөөс 3.5 сая төгрөгийн дундажтай байна.

Харин нэг өрөө орон сууцны түрээсийн үнэ 900 мянган төгрөгөөс 1.2 сая орчим төгрөгийн хооронд байсан бол 2026 оны эхэн үеийн байдлаар ойролцоогоор 300 орчим мянган төгрөгөөр нэмэгджээ.

2026 оны нэгдүгээр сард нийслэлийн Сонгинохайрхан дүүргээс бусад дүүргүүдэд шинэ болон хуучин орон сууцны нэг мкв-ийн үнэ 4-5 сая төгрөгийн хооронд байгаа нь өмнөх оны мөн үеэс 8 хувиар өссөн дүн бөгөөд сүүлийн гурван жилийн хугацаанд үндсэндээ 44 орчим хувиар үнэ өсөөд буй юм.

Ялангуяа хуучин орон сууцны үнэ шинэ орон сууцны үнээс илүү өсөлттэй байгаа нь түрээсийн үнэд ч мөн нөлөөлж буй. Тухайлбал хуучин орон сууцны мкв-ийн үнэ 5 сая төгрөг давсан нь жилийн дотор 17 хувиар өссөн үзүүлэлт.

Сүхбаатар дүүрэгт хуучин орон сууцны дундаж үнэ 5.9 сая төгрөг давж, бусад дүүргүүдэд хуучин орон сууцны мкв-ийн үнэ 4.5 сая төгрөг хүртэлх болж өсчээ. Хан-Уул дүүрэгт хуучин орон сууцны мкв-ийн үнэ 5.7 сая төгрөг, Чингэлтэй дүүрэгт 5.4 сая төгрөгийн ханштай байна.

Орон сууцны ипотекийн зээл 2025 онд үндсэндээ царцаж, энэ хэрээр орон сууцны худалдан авалт буурсан нь үнийн өсөлтөд нөлөөлөөд зогсохгүй цаашид орон сууцны зээл хэвийн үргэлжлэхгүй тохиолдолд үнэ улам өсөх нөхцөл бүрдэх боломжтой юм.

Үүнийг дагаад түрээсийн орон сууцны үнэ ч мөн нэмэгдэх төлөвтэй байна.