МАН-ын 31 дүгээр Их хурлаас шинээр бүрдүүлсэн Бага хурлын II хуралдаан "Эрх чөлөөний дөрвөн зам, дөрвөн чөлөөлөлт" уриатай болж өндөрлөсөн. Өөрөөр хэлбэл МАН-ын дарга Н.Учрал анхныхаа Бага хурлыг зохион байгуулж, бодлогоо танилцуулсан. МАН-ын Бага хурлын шинэчилсэн бүрэлдэхүүн 597 гишүүнтэй бол хуралдаанд 583 гишүүн оролцож хуралдаанаар долоон асуудал хэлэлцсэн.

Хуралдаан МАН-ын дарга, УИХ-ын дарга Н.Учралын улс төрийн илтгэлээр эхэллээ. Тэрбээр илтгэлдээ "Улс төрийн нам бол амьд организм. Буруу зуршлаа таягдан хаяж зөв хэвшилд дардан суралцаж өөрсдийгөө баригдмал сэтгэлгээнээсээ чөлөөлж байж Ардын нам ардынхаа итгэлд эргэн ирнэ. Түмнийхээ сэтгэлд дахин төрнө хэмээх зорилго бол миний үзэл санааны чиг шугам юм. Тус дэм бэрхийг нь туулж бүтээсээр ирсэн МАН шинэ сорилтын өмнө ирлээ. Аливаа шинэ сорилт болгон шинэ түүх бүтээх боломжийг эрэлхийлдэг МАН-ын 105 жилийн ой эх орончдын баярыг тэмдэглэхийн утга учир нь ч алдаагаа засаад ололт амжилтаа амжилттай бататгаад шинэ түүхээ бүтээхэд оршино. Ардын нам урвасан ч босдог нам уруудсан ч өсдөг нам гэдгээ ахин батлан харуулах нь өнөөгийн бидний үүрэх ачаа туулах зам. Өнөөдөр та бид Ардын нам ардынхаа итгэлт эргэн ирэх замаа хамтдаа зураглана" гэдгийг онцлов.

Н.Учрал залуу даргын хувьд намын бүтэц бүрэлдэхүүн, бодлогын томоохон шинэчлэлийг эхлүүлээд байгаа билээ. Илтгэлдээ ч үүнийг онцлоно лээ.

Мөн үеэр МАН-ын дарга Н.Учрал "Прокурорын байгууллагаас авлига албан тушаалын хэрэгт яллагдагчаар татагдсан УИХ-ын гишүүн Д.Амарбаясгалан, Эрчим хүчний сайд асан Н.Тайванбэх, Үндсэн хууль зөрчсөн нь Үндсэн хуулийн цэцийн дүгнэлтээр тогтоогдсон УИХ-ын гишүүн Х.Булгантуяа, нам дамнасан бүлэглэл байгуулж, нийгмийг эмх замбараагүй байдалд удаа дараа турхиран, МАН-ын бодлого үйл ажиллагааг зохион байгуулалттайгаар гүтгэн харлуулж, намын бодлогыг гуйвуулан завхруулж, намын гишүүний ёс зүй, сахилга, хариуцлагыг уландаа гишгэсэн бага хурлын гишүүн асан, "Монголын үнэн" сонины эрхлэгч асан А.Амундра нарыг МАН-ын гишүүнээс чөлөөлөх нь зүйтэй гэж үзсэн.

Харин намын Удирдах зөвлөлийн гишүүн, Ерөнхий сайд Г.Занданшатар "Манай Засгийн газар эдийн засгийн өсөлтийн өгөөжийг өрх бүрт хүргэх зорилготой цэгцрэх 300 хоногийн төлөвлөгөөг батлан хэрэгжүүлж эхлээд байна. Өөрөөр хэлбэл, эдийн засгийн өсөлтөө иргэн бүртээ хүртээсэн Засгийн газар байхын тулд бодлогын шат дараалсан шинэчлэлүүдийг хэрэгжүүлнэ" гэлээ.

МАН-ын Бага хурлын II хуралдаан ихээхэн онцлогтой. Учир нь Удирдах зөвлөлийн дэргэд ажиллаж буй бодлогын 11 хороо тус бүр салбар хуралдааныг зохион байгуулж, эрдэмтэн судлаачдыг оролцуулсан өргөн хэмжээний хэлэлцүүлэг хийж бодлогын шийдлүүдийг гарган Бага хуралд танилцуулах юм. Энэхүү бодлогын 11 хорооноос зөв зүйтэй шийдлүүд гарна гэдгийг ч онцолж байв.

Тухайлбал, “Гишүүн төвтэй нам 4-E стратеги”-ийг хөгжүүлэх бодлогын хорооны даргаар УИХ-ын гишүүн Н.Батсүмбэрэл, Боловсрол, шинжлэх ухааны бодлогын хорооны даргаар УИХ-ын гишүүн Ж.Галбадрах, Дэд бүтэц, хөгжлийн төслүүдийн бодлогын хорооны даргаар УИХ-ын гишүүн Г.Лувсанжамц, Хот байгуулалтын бодлогын хорооны даргаар Ж.Алдаржавхлан, Эдийн засаг, банк санхүүгийн бодлогын хорооны даргаар УИХ-ын гишүүн Д.Энхтүвшин,Төрийн бүтээмж, засаглалын шинэчлэлийн бодлогын хорооны даргаар Ц.Сандаг-Очир, Хөдөөгийн хөгжлийн бодлогын хорооны даргаар УИХ-ын гишүүн Ц.Идэрбат, Хүртээмж ба тэгш оролцооны бодлогын хорооны даргаар УИХ-ын гишүүн О.Саранчулуун, Эрүүл мэндийн бодлогын хорооны даргаар УИХ-ын гишүүн Д.Ганмаа, Технологи, инновацийн бодлогын хорооны даргаар УИХ-ын гишүүн Ч.Анар, Хүний эрхийн бодлогын хорооны даргаар УИХ-ын гишүүн Х.Баасанжаргал нар ажиллаж байгаа билээ.

Tumen.mn