Л.Оюун-Эрдэнийн хүн гэдгээрээ ч, Г.Заншатарыг огцруулахад чуулганы хуралдааныг удирдаж байсан гэдгээрээ ч огцрохдоо тулаад буй УИХ-ын гишүүн Х.Булгантуяагийн СДМЭХ-ны ерөнхийлөгчийн суудалд шунагсад олон байв.

МАН-ын дэргэдэх энэ холбоо гишүүд болон сонгогчдын багагүй хувийг эзэлдэг төдийгүй, ерөнхийлөгч нь УИХ-ын сонгуульд нэр дэвших боломжоо бараг л шууд олоод авчих суудал тул өрсөлдөөн ч их.

Гэтэл энэ суудлын төлөөх амбиц, нөлөөллүүдээс "Сод Монгол"-ын Ц.Анандбазарын нөлөөгөөр түрүүлж, түлхүүлж, шахуулж байж арай ядаж очиж суусан УИХ-ын гишүүн Д.Үүрийнтуяа саях СДМЭХ-ны Их хурал дээрээ бусдын санааг хулгайлж, танилцуулжээ.

Улмаар энэ талаар СДМЭХ-ны дэд ерөнхийлөгчөөр ажиллаач гэж Д.Үүрийнтуяа өөрөө санал тавьж, хэд хэдэн удаагийн уулзалтаар танилцуулсан бодлого хөтөлбөрийг нь шагшин сонсож байсан хүнийхээ WOMEN бодлогын хөтөлбөрийн цөмийг бүгдийг нь хурал дээр танилцуулж, хүний юмыг өөрийн мэтээр тайлбарлан алга ташуулсан аж.

Энэ талаар Төрийн бодлогын чиглэлээр ажиллаж ирсэн туршлагатай О.Энхзул гэх эмэгтэй өөрийн цахим хуудаст шүгэл үлээсэн юм.

Уг нь Д.Үүрийнтуяа өөрөө ажлын санал тавьж, тэр ч бүү хэл О.Энхзулыг гадагшаа гэр бүлээрээ ажлаар явахаар төлөвлөж байхад нь биеэрээ байх хэрэгтэй хэмээн явахыг нь болиулсан мөртлөө холбооны дэд ерөнхийлөгчийн тоог 9 байсныг 15 болгоно гэж зарлахдаа О.Энхзулыг багтаагаагүй байв.

Түүнчлэн СДМЭХ-ны хурал дээр нь санал шүүмж хэлсэн гишүүдээ хуучин, шинэ даргын хүн гэж ялгаж, адлаад эхэлсэн гэдгийг ч шүгэл үлээж хэлсэн юм.

МАН Н.Учралд намын даргын тамгаа өгсний дараачаас намд нь олон талаар оролцоотой байж ирсэн ах нарынхаа ачыг хариулах дөнгөнд уначхаад буй. Түүний нэг жишээ нь Д.Үүрийнтуяаг СДМЭХ-ны даргад зүтгүүлэх байсан. Заалнаас шудрагаар дэмжлэг аваад гараад ирэх шаанс бага түүнийг ийн чадварлаг, менежерийн санааг хулгайлаад танилцуулчихаж байгаагаас харвал цаашид энэ холбоонд ихийг хийнэ гэж хүлээлтгүй биз ээ.

Eguur.mn