Ерөнхийлөгч У.Хүрэлсүх УИХ-ын гишүүний ёсзүй, хариуцлагын асуудалтай холбогдуулан УИХ-ын гишүүнийг эгүүлэн татах хуулийн төслийг санаачилж, УИХ-д өргөн барихаар бэлэн болсныг Ерөнхийлөгчийн тамгын газраас мэдээлсэн.

Хуульд УИХ-ын гишүүнийг эгүүлэх татах тухай хуульд ёс зүйн зөрчил гаргасан, өргөсөн тангаргаасаа няцаж ноцтой зөрчил гаргасан, гэмт хэрэг үйлдсэн болох нь шүүхийн эцсийн шийдвэрээр тогтоогдсон, жагсаалтаар нэр дэвшиж сонгогдсон гишүүн ёс зүйн ноцтой зөрчил гаргасан тохиолдолд эгүүлэн татна гэж тодорхой заажээ. Тэгвэл тус хууль нь олон нийтийн төдийгүй зарим УИХ-ын гишүүдийн дэмжлэгийг аваад байна. Дэмжээд зогсохгүй олон нийт “Ерөнхийлөгчийн хууль” хэмээн нэр өгчихсөн дэмжиж байгаа аж.

Тэгэхээр уг хуулийг өргөн бариад батлахаар парламентын танхимыг орхих олон гишүүд бий. Тэдний тэргүүн эгнээнд хавтас хэрэг нь бэлэн болчихсон. Тэр ч бүү хэл гурван шатын шүүхийн тогтоол нь хэвээрээ байгаа УИХ-ын гишүүн Д.Цогтбаатар нэрлэгдэнэ. Тодотгож хэлбэл хууль хэлэлцлээ, баталлаа, хэрэгжлээ, Д.Цогтбаатар татагдлаа гэсэн үг.

Хэргийг эргэн сануулахад Д.Цогтбаатар 2016-2020 онд Хөгжлийн банкны хэлтсийн захирлаар ажиллаж байхдаа албан тушаалаа урвуулан ашиглаж, “Мон дулаан”, “Газ импорт”, “Бэрэн” компанид давуу байдал олгосон хэргээр шалгагдан, 2023 оны долоодугаар сард Сүхбаатар дүүргийн Эрүүгийн хэргийн анхан шатны шүүхээс нийтийн албанд томилогдох эрхийг нь хоёр жил хасаж, 20 сая төгрөгөөр торгох ял оноосон байдаг. Улмаар анхан шатны шүүхийн шийдвэрийг 2024 оны арванхоёрдугаар сарын 11-нд Улсын дээд шүүхээс хэвээр үлдээсэн.

Өөрөөр хэлбэл манай парламентад ял авсан гишүүн хууль зөрчин ажиллаж байна гэсэн үг. Тиймээс олны хэлснээр “Ерөнхийлөгчийн хууль” батлагдахад парламентийг орхих анхны гишүүн нь Д.Цогтбаатар юм.