Их улс төрийн хоймроос Л.Оюун-Эрдэнэ бууснаар түүний хамаарал бүхий нөхөд ч ганц нэгээрээ эрх мэдлийн индэр дээрээс буусаар байна. Зарим нь хууль хяналтын байгууллага чиглэх аж. Харин Хотын дарга Х.Нямбаатар тэсэж үлдсэн цөөн хүний нэг. Тиймээс “Х.Нямбаатар хэзээ нэгэн цагт явна” гэсэн үүднээс түүнийг ихэс дээдэс ч оролдож байна. Жижиг гарууд ч оролдож байна.

Сүүлийн үед УИХ-ын гишүүн Э.Бат-Амгалан ихээхэн сонирхож байгаагаа ч олон нийтийн сүлжээнээс нууж чадсангүй. Харин Х.Нямбаатар “Миний ажлыг авмаар байгаа бол хурлаа зарлаад ав. Энд, тэнд анкетаа барьж дарга нарын үүд сахиж гоншгонох хэрэггүй. Эсвэл хууль хяналтын байгууллагаар хүч хэрэглээд ав. Э.Бат-Амгаланд хоёр л зам байна” хэмээн нийтийн сүлжээнд мэдэгдээд байна.

Гэтэл Э.Бат-Амгалан эхэндээ “Надад хийх ажил их байна. Миний найз Хотын дарга намайг улс төрийн захиалгатай харлуулж гүтгэж байна” гэж байсан бол одоо “Нам намайг нийслэлийн намын хороонд томилбол би саналыг хүлээн авна. Түүнээс өөрөө санаархаж байгаа зүйл байхгүй” хэмээн Нийслэлийн намын хороог үнэхээр сонирхож байгаагаа нуугаагүй. Тэгэхээр Э.Бат-Амгалангийн цаана МАН-ын удирдлагуудад нийслэлийн МАН-ыг авах сонирхол ихээхэн байгаа бололтой. Э.Бат-Амгалангийн хувьд зүгээр л ил гарч байгаа бамбай юм.

Болж буй үйл явдлаас харахад Х.Нямбаатараас нийслэлийн МАН-ын хороог авах ажиллагаа нам дотор нь эхэлсэн илт байна. Уг нь намын даргын сонгуулийн өмнө Ерөнхийлөгч У.Хүрэлсүх хотын дарга Х.Нямбаатартай уулзаж тохироо хийсэн гэсэн мэдээлэл улс төрийн хүрээнд байсан. Тэгвэл энэ тохироо хэдхэн сарын дараа өөрчлөгдөж, оны өмнө нийслэлийн намын хорооны хурлыг зарлах байсан ч хойшлуулсан бөгөөд ойрын хугацаанд хуралдуулахаар ярьж байгаа гэх мэдээлэл бий. Х.Нямбаатар яах аргагүй Л.Оюун-Эрдэнийн багийн хүн учраас тахимаа өгөхөөс өөр аргагүй байдал хүрч таарна.

Уг нь Х.Нямбаатар жижиг улстөрч биш. Нийслэлийн намаа удирдан сонгуульд орж, 45 суудлаас 40-ийг нь авч чадсан. Өмнө нь хэрэгжүүлж байгаагүй олон шинэ төслүүдийг зориглон хийж байгаа Засаг дарга гэхэд болно. Гэтэл Баянзүрх дүүргийг найман жил ялагдлын ёроолд байлгасан Э.Бат-Амгалангаас солино гэдэг алдаа болно. Үнэхээр “Гарман дээр морио солино” гэгч л болно доо. Э.Бат-Амгаланг Баянзүрхийн МАН-ын хорооны даргаар ажиллах найман жилд тус дүүрэгт АН засагласан шүү. Нэг удаа дүүргийн засгийг хүчээр шахам аваад хэдхэн цаг дүүргийн Засаг дарга байж үзсэн гээд Х.Нямбаатарын дэргэд ёстой сураггүй нөхөр. Нийслэлийн МАН-ын хороо бол шунахаас өөр аргагүй газар л даа. Монгол Улсын хүн амын тал хувь нь амьдардаг нийслэлийн МАН шүү дээ. Ерөөсөө л төв МАН гэсэн үг. Тэгэхээр их багагүй шуналын харцаа унагаалгүй яахав.

Tumen.mn