Өчигдөр Хөгжлийн банкны гэх тодотголтой нэр бүхий 42 хүнд холбогдох хэргийг хянан шийдвэрлэсэн Нийслэлийн Эрүүгийн хэргийн давж заалдах шатны шүүх Т.Пүрэвсүрэн, С.Батзориг, Н.Отгочулуу, Ч.Нэргүй, М.Баянмөнх, Б.Найдалаа, Б.Лхагвасүрэн, Р.Батбаяр, М.Золжаргал, Г.Дашзэвэг, Г.Одонтуул, Б.Батзаяа нарыг цагаатгасан шийдвэрийг хэрэгсэхгүй болголоо.

Үүний өмнө, Сүхбаатар, Чингэлтэй, Баянзүрх дүүргийн Эрүүгийн хэргийн анхан шатны тойргийн шүүх өнгөрсөн есдүгээр сард (2025.09.17) "Хөгжлийн банк"-ны хэргийг хэлэлцэн шийдвэрлэхдээ эдүгээ Сангийн яамны Төрийн нарийн бичгийн даргаар томилогдсон М.Баярмагнайд Эрүүгийн хуулийн тусгай ангийн 22.1 дүгээр зүйлийн 2 дахь хэсэгт зааснаар нийтийн албанд томилогдох эрхийг хоёр жилийн хугацаагаар хасаж, 10 мянган нэгжтэй тэнцэх хэмжээний буюу 10 сая төгрөгөөр торгох ял оноосон.

Гэтэл тэрбээр оны өмнөхөн Монгол Улсын Төрийн албаны хуульд зааснаар төрийн жинхэнэ алба буюу төрийн захиргааны албаны дээд албан тушаал болох Төрийн нарийн бичгийн даргаар томилогдоод зогсохгүй, өөрийн нь холбогдсон хэргийг шүүхээр хянан хэлэлцэж байгаа энэ өдрүүдэд Монгол Улсын Шүүхийн ерөнхий зөвлөлийн дарга, гишүүдтэй уулзан тус байгууллагын хэрэгцээнд төсвийн тодотголд хоёрын зэрэг барилга байшингийн , хөрөнгийг тусгахаар амласан тухай мэдээлэл гарч энэ уулзалтын талаар Шүүхийн ерөнхий зөвлөл өөрийн албан ёсны баталгаажсан пэйж хуудаст мэдээлжээ.

Яллагдагч-Төрийн нарийн бичгийн дарга гэж байж байдаг, тэгээд шүүхийн хараат бус байдлыг хангах үндсэн чиг үүрэг бүхий байгууллагад сонирхлын ийм зөрчилтэй хүн ийм үйл явдлыг давхцуулан “айлчилж” түүнээ ил цагаан зарлаж байдаг, энэ ямар нийгэм бэ?! Хууль журам, ёс зүй хаана байна вэ?! Төрийн тэргүүн, Монгол Улсын Ерөнхийлөгч ёс зүйн алдаа гаргасан, иргэдийн төр удирдах эрхийг төлөөлөн хэрэгжүүлж чадахгүй байгаа Улсын Их Хурлын гишүүдийг эргүүлэн татах хуулийг санаачилж сахилга хариуцлагыг чангатгахаар хууль өргөн барьсан өдөр, эрх баригч намын тавьсан Төрийн нарийн бичгийн дарга шүүх эрх мэдэл рүү нулимж харууллаа, Ерөнхийлөгч өө! Үүнийг харж хянаж шалгаж байдаг Авилгатай тэмцэх газар, прокурорын байгууллага анхааралдаа авууштайг онцлож байна.