Парламентын түүхэнд бичигдэх нэгэн шийдвэрийг өнөөдрийн чуулганы хуралдаанд оролцсон гишүүд гаргав. Ерөнхийлөгч У.Хүрэлсүхийн санаачилсан УИХ-ын гишүүнийг эгүүлэн татдаг болох хуулийн төслийг 101 гишүүний 57 нь дэмжсэн юм.

Ийнхүү гишүүдийн олонхын дэмжлэг авснаар УИХ-ын гишүүнийг хариуцлагажуулах гэдэг эерэг танилцуулгатай ч парламентын дархлааг хөндөж, төлөөллийн ардчиллыг хааш нь ч эргүүлж болзошгүй хуулийн төсөл "амиллаа".

Санал хураалтын өмнөх өдөр Төрийн ордонд болсон зөвлөгөөнийг нээх үеэрээ Ерөнхийлөгч "УИХ үнэхээр ард түмнээс эхтэй юм бол төрийн тэргүүний өргөн барьсан, ард түмний хүсэмжилж байгаа хуулийг хэлэлцэж батлах ёстой. Эс тэгвээс ард түмнийхээ эсрэг нулимж байгаатай адилхан гэж ойлгож болно. Энэ хуулийг хэзээ батлах хүртэл нь төрийн тэргүүн хуулийн хүрээнд өргөн барьж ажиллана. Ард түмнээрээ хэлэлцүүлнэ. Олон аргууд байгаа" хэмээн заналтай хэлсэн юм. Төрийн тэргүүний сүрдүүлэг гэмээр үг байгаа оносон.

Харин УИХ дахь олонхын бүлэг доторх цөөнх буюу өөрсдийгөө "30" талынхан гэж нэрлэсэн Л.Оюун-Эрдэнэ, Д.Амарбаясгалан тэргүүтэй гишүүд уг хуулийн төслийг тууштай эсэргүүцсээр байгаа. Ялангуяа тэдэн дундах эмэгтэй гишүүд эсэргүүцлээ ил тод, идэвхтэйгээр илэрхийлсээр буй.

Тэдгээр эмэгтэй гишүүд өнөөдрийн хуралдаанд оролцохдоо улаан, ягаан өнгөөр ижилсэн нь эрхгүй анхаарал татахаар байв.

Мөн хуулийн төслийг дэмжих эсэх санал хураалтын үеэр М.Нарантуяа Нара, Л.Оюун-Эрдэнэ нарын гишүүд эсэргүүцлээ илэрхийлж байсан нь зурагчны дуранд ийнхүү буужээ.