Тэжээсэн бяруунууд чинь тэрэг эвдээд байна

Англи, хятад хэлтэй, Хятад, Америкт төгссөн эдийн засагч, өрнө дорнын боловсрол эзэмшсэн Х. Булгантуяа…түүнээс ямархан нэгэн оновчтой шийдвэр, судалгаатай гаргалгаа хүлээн, найдан харж байсан олон, олон хүний нэг нь би лдээ. Иелийн их сургуульд элссэн, сурсан тухайгаа ярьсныг нь зорьж олж сонсон, улс төрд урагшаа давхих шинэ цагийн эмэгтэй улстөрч хэмээн харж байлаа. Харин энэ итгэл Х. Ганхуяг гишүүний нэртэй албан хуудас дээр гарын үсгээ зуран УИХ-д оруулж ирсэн Хөрөнгө оруулалтын тухай хуульд оруулах өөрчлөлтийг нь үзээд нуран унасан байдаг юм. Тухайн үедээ старт апп компаниуд бий болж, хөгжүүлэхэд гаднын хөрөнгө оруулалт асар их хэрэгтэй байгаа тухай, түүнд Монголд 50 мянган ам.доллар буюу амьдрах хоёр өрөө байрныхаа мөнгийг чирээд ирсэн гаднын иргэн урт удаан хугацаагаар оршин суух эрх авах талаар тайлбар дагалдаж байлаа. Энэ хууль олон нийтийн хүчтэй эсэргүүцэлтэй тулж зогссон. Түүнээс хойш Монголын старт апп компаниуд бэрхшээл, амжилт хоёроо үүрэн өндийсөөр л байгаа даа. Харин өнөөдөр эргээд харахад Булгантуяа намаасаа том, төрөөсөө том болжээ. Номинчимэг найзынхаа зүтгэлээр Олон Улсын парламентийн холбоо хүртэл заргалдаж, гаднын нөлөө бүхий сэтгүүлд өөрийнх нь УИХ-ын гишүүний эрх зөрчигдсөн тухай төлбөртэй гэж хардаж болохуйц нийтлэл бичүүлж амжжээ. Үгийн тоо, үнэ өртөгийг нь бид мэдэх болсон, гаднын хэвлэлд гарна гэдэг шударга үнэний хэмжүүр байхаа больсон цаг лдаа. Тэгэхдээ энэ алхмаараа Булгантуяа, Номинчимэг нар Монгол бол дарангуйллын системтэй улс гэж дэлхийд нотлохыг оролдож байна. Монгол бол ардчилалгүй улс гэж олон улсын индэр дээр зарлахаас буцсангүй. Өөрийгөө өмөөрөхийн тулд өөрийн улсыг жижигрүүлэх оролдлого гэж харж болно. Энэ тийм амар юм уу, амиа бодсондоо амныхаа зоргоор унагадаг үг үү? Амар байсан бол юу гээд л дэлхий даяар хоёр системийн дайн энэ олон жил үргэлжлэх юм бэ? Сайн ч, муу ч АН гэж байна, ардчилсан эрх чөлөө байна, ардчилсан үзэл санааг шингээсэн Үндсэн хууль маань байна. УИХ-ын гишүүд нь ингээд байхаар Монголыг зорих хөрөнгө оруулалтууд, Монголтой хамтран ажиллах гадныхны эрмэлзэл юу болох вэ? Уг нь МАН-ын Булгантуяа, Номинчимэг нарыг энэ хүртэл явахад монголчууд дэмжээгүй биш дэмжсэн, сонгогчдын итгэл, татвар төлөгчдийн мөнгө хөлөөс нь өргөж, өлмийг нь тулсан. Гэтэл тэжээсэн Булгантуяа тэрэг эвдэхээс буцсангүй. Үндсэн хуулийнхаа дээр оршихыг хүсэв. Тусгаар улсынхаа хууль, төрт ёсны дээгүүр алхаж, Олон Улсад гарч заргалдана гэнэ ээ. Олон Улсын гэх хуулиар амьдармаар байгаа бол тэр олон улсынхаа аль нэгэнд очиж амьдрах хэрэгтэй. Монгол Улсын нутаг дэвсгэр, тэр тусмаа төрийн ордонд Монгол Улсын хууль журмууд л үйлчлэх болно. Дээр нь Номинчимэгийн нөхөр Оюутолгойн ТУЗ-д байдаг, Олон Улсын парламентийн холбоонд бага ч болов алба хүлээхэд энэ нь нөлөөлсөн байж болох уу, гэтэл Монголын Засгийн газар Оюутолгойн гэрээгээ сайжруулах гээд Рио Тинтотой харилцан нүүр тулсан эл үе таараад байдаг, энэ бүхэн ямар нэгэн сэжмээр холбогдож, манай талд дарамт учруулж, Монгол Улсын гадаад дахь нэр хүндээр барьцаалж болох уу? МАН толгой дээрээ гаргаж, тогооныхоо дээжийг аягалдаг хэдэн хүнтэй болох нь ч болжээ. Тэжээсэн бяруунууд чинь тэрэг эвдээд л байж байг уу? Хүний эрх зөрчигдсөн олон, олон тохиолдлыг гөлийгөөд өнгөрөөж байсан энэ хүмүүс өөрийн эрхэнд ямар эмзэг байна ааа? Эцэст нь энэ хэдэн улс төрийн намд хандаж хэлэхэд, Монголын татвар төлөгчдийн чадан ядан төвлөрүүлдэг санхүүжилт дээр Монгол төрийн түшээ л бойжих ёстой шүү! Боловсрол нь байгаад ч зүрх сэтгэл нь өөр бол зүгээ алддаг хорвоо ажээ.

Нийтлэлч Эмүжин