Японы худалдааны ашиг 667 тэрбум иен буюу 4.2 тэрбум ам.доллар хүрч тэлэв

(Bloomberg) -- БНХАУ-ын талаас эрэлт сэргэж, хагас дамжуулагч болон цахилгаан эд ангийн нийлүүлэлт өндөр түвшинд хадгалагдсантай холбоотойгоор гуравдугаар сард Японы экспортын өсөлтийн хурд эрчимжлээ. Лхагва гарагт тус улсын Сангийн яамны мэдээлснээр нийт экспортын үнийн дүн өмнөх оны мөн үеэс 11.7 хувиар өссөн нь хоёрдугаар сарын дөрвөн хувьтай харьцуулахад эрс эрчимжсэн үзүүлэлт болж байна.

Энэ нь шинжээчдийн медиан таамаг болох 11 хувиас давжээ. Тайлант хугацаанд Японы импорт өмнөх оны мөн үеэс 10.9 хувиар өссөнөөр мөн л өмнөх сарын 10.3 хувиас хурдассан гүйцэтгэлтэй гарсан байна. Ингэснээр улирлын нөлөөллийг арилгаагүй дүнгээр тооцоход Японы худалдааны ашиг 667 тэрбум иен буюу 4.2 тэрбум ам.доллар хүрч тэлжээ.

Түүнчлэн өнгөрсөн сард Японы АНУ-д хийсэн нийт экспорт 3.4 хувиар өссөн байна. Автомашины экспорт нь тоо ширхгээр 2.3 хувиар өссөн ч тарифын дарамтын улмаас үнийн дүнгээр 1.6 хувиар буурсан гүйцэтгэлтэй байна. Хэдий тийм боловч цэнэг хураагуурын нийлүүлэлт 57 орчим хувиар эрчимжиж, худалдаа эерэг үзүүлэлттэй гарахад түлхэц болжээ. Тайлант хугацаанд Японы БНХАУ-д хийсэн экспорт 17.7 хувиар, Европт 18.2 хувиар эрчимжсэн байна.