ХГБХХЕГ-ын Б.Баярсайхан Ховд аймагт бусдын гарт амь насаа алдсан охины аав С.Аманжол болон өмгөөлөгчдийн багтай өнөөдөр уулзаж, охины ар гэрт үзүүлэх шаардлагатай дэмжлэг, үйлчилгээний талаар ярилцаж шийдвэрлэлээ.

Охиныг эрэн хайх үйл явцаас эхлээд өнөөдрийг хүртэл Хүүхэд, гэр бүлийн хөгжил, хамгааллын ерөнхий газраас Ховд аймгийн Хүүхэд, гэр бүлийн хөгжил, хамгааллын газрыг арга зүйгээр ханган ажиллаж байна.

Хэрэг хянан шийдвэрлэх үйл явц үргэлжилж байгаа энэ хугацаанд охины ар гэр Улаанбаатар хотод амьдрахаар болсон. Харин ах, дүү нарынх нь хичээлийг тасалдуулахгүй сурах эрхийг хангах үүднээс Улаанбаатарт амьдрах харьяаллынх нь дагуу шилжүүлэн суралцуулах асуудлыг Боловсролын Ерөнхий Газрын дарга Х.Тамиртай уулзаж шийдлээ.

Одоогоор тухайн гэр бүл, аав ээж, ах эгч, дүүгийн сэтгэл зүйн байдал маш хүнд, тогтворгүй байна. Тиймээс Ховд аймагт сэтгэл зүйчид болон агентлагаас холбогдох мэргэжилтнүүд ажиллана.

ХГБХХЕГ-ын дарга Б.Баярсайхан: Тухайн гэр бүлийн ЕБС-ийн насны хүүхдүүдэд шаардлагатай байгаа хичээлийн хэрэгсэл мөн өмгөөлийн үйлчилгээ үзүүлж байгаа хуульчдад зохих дэмжлэгийг үзүүлэх болно. Харин олон нийт, хэвлэл мэдээллийн байгууллагуудаас хүүхдийн хувийн мэдээлэлд хүндэтгэлтэй, ёс зүйтэй хандахыг хүсэж байгаагаа хэллээ.

2026-09-03