Хүүхэд, гэр бүлийн хөгжил, хамгааллын ерөнхий газраас Олон улсын хүүхдийн “Найрамдал” цогцолборын зуны 8 дугаар ээлжинд Хөлбөмбөгийн Азийн аварга шалгаруулах U17 насны ангилалд Монгол Улсаа төлөөлөн оролцох 32 тамирчин хүүхдийг хамруулсан бол 9 дүгээр ээлжинд Үндэсний их баяр наадамд амжилттай оролцсон өсвөрийн 4 бөх, 10 харваач, 100 уралдаанч хүүхдийг хөгжил, оролцооны тусгай хөтөлбөрт бэлэг болгон хамрууллаа.

21 Аймаг, дүүрэг бүрээс зусландаа амрахаар хүрэлцэн ирсэн эдгээр хүүхдүүдийн ихэнх нь анх удаа зусланд амарч байгаа бөгөөд үе тэнгийн олон шинэ найзуудтай болж, хөгжлийн хөтөлбөрүүдэд хамрагдан суралцах зүйлээр дүүрэн өдөр хоногуудыг өнгөрүүлснээ сэтгэл дүүрэн хуваалцлаа.

Цаашид ирэх жилүүдэд ч мөн энэхүү зарчмаар Үндэсний их баяр наадамд амжилттай оролцсон өсвөрийн тамирчид, уралдаанч хүүхдүүдээ үргэлжлүүлэн урамшуулах юм. Мөн уралдаанч хүүхдүүд маань үе тэнгийн найзууддаа морины соёл, мэдлэг ойлголтыг өгч, морь унах арга ухаанаасаа хуваалцах зэргээр тухайн ээлжийн хөтөлбөрийн агуулгыг өргөжүүлэн, уялдуулан зохион байгуулахаар төлөвлөн ажиллажээ.

Уралдаанч хүүхдүүдийн аюулгүй байдлыг хангах, хүүхэд хамгаалал болон тэдний хөгжлийг дэмжих чиглэлээр идэвхитэй хамтран ажилласан Монголын морин спорт, уяачдын холбооны хамт олонд Хүүхэд, гэр бүлийн хөгжил, хамгааллын ерөнхий газраас талархал илэрхийлж байлаа.