Хүүхэд, гэр бүлийн хөгжил, хамгааллын ерөнхий газар (ХГБХХЕГ) болон Монголын Хүүхдийн Зөвлөл (МХЗ)-өөс жил бүр уламжлал болгон зохион байгуулдаг “Үндэсний майхант цугларалт” энэ жил Монгол Улсын Ерөнхий сайд, Хүүхдийн төлөө Үндэсний зөвлөлийн Тэргүүн Н.Учралын ивээл дор амжилттай зохион байгуулагдаж өндөрлөлөө.

Таван өдрийн турш Орхон аймаг дахь “Найрамдлын Эрдэнэс” хүүхдийн зусланд Монгол Улсын 21 аймаг, нийслэлийн 9 дүүргийн хүүхдийн оролцооны байгууллагын 500 гаруй төлөөлөл чуулж, хүүхдийн эрх, хөгжил, оролцоо, үе тэнгийн дээрэлхэлт, цахим орчны аюулгүй байдал, осол гэмтлээс урьдчилан сэргийлэх зэрэг тулгамдсан асуудлаар хэлэлцэн, шийдлийн санал, санаачилгаа нэгтгэлээ.Цугларалтын хүрээнд оролцогчид “Хүүхдийн төлөө -За бол заавал хийе” үндэсний хөдөлгөөний зорилго, хэрэгжилттэй танилцаж, хэлэлцүүлэг, өртөөчилсөн сургалт, хөгжлийн олон талт үйл ажиллагаанд идэвхтэй хамрагдан, хүүхдийн дуу хоолойг төрийн бодлого, шийдвэрт хүргэх санал, уриалгаа боловсруулсан юм.

Мөн Монголын Хүүхдийн Зөвлөлийн удирдлагын сонгууль болж МХЗ-ийн IV үеийн тэргүүн, Хүүхдийн төлөө Үндэсний зөвлөлийн гишүүн Г.Дашням үүрэгт ажлаа хүлээлгэн өгч, МХЗ-ийн V үеийн тэргүүнээр Д.Алдардэлгэр, дэд тэргүүнээр С.Энхсайхан сонгогдон туг, тамгаа хүлээн авч, эрхийн батламжаа гардлаа.

Хаалтын ажиллагаанд Хүүхэд, гэр бүлийн хөгжил, хамгааллын ерөнхий газрын дарга Б.Баярсайхан хэлсэн үгэндээ хүүхдүүдийн дэвшүүлсэн санал, санаачилга төрийн бодлого, шийдвэрт бодитоор тусах нь энэхүү цугларалтын хамгийн чухал үр дүн болохыг онцоллоо. Тэрээр мөн Засгийн газрын мөрийн хөтөлбөрт туссан хөдөө орон нутгийн сургууль, цэцэрлэг, дотуур байрны модон жорлонг бүрэн халж, орчин үеийн ариун цэврийн байгууламжтай болгох ажлыг “Эрдэнэт үйлдвэр” ТӨҮГ нийгмийн хариуцлагын хүрээнд дэмжин хэрэгжүүлснээр энэ хичээлийн жилээс 21 аймгийн 330 сумын хүүхдүүд эрүүл, аюулгүй орчинд суралцах боломж бүрдсэнийг онцлон тэмдэглэж, хамт олонд талархал илэрхийллээ.

Хэлэлцүүлгээс гарсан санал, санаачилга, уриалгыг Монголын Хүүхдийн Зөвлөл нэгтгэн Монгол Улсын Засгийн газар, Хүүхэд, гэр бүлийн хөгжил, хамгааллын ерөнхий газарт хүргүүлэх бөгөөд цаашид холбогдох байгууллагуудад уламжилж, хүүхдийн төлөөх төрийн бодлого, шийдвэрт тусган хэрэгжүүлэхэд анхаарч ажиллах юм.

Энэхүү арга хэмжээг өөрийн ивээл дор зохион байгуулах санаачилгыг гаргаж, дэмжин ажилласан Монгол Улсын Ерөнхий сайд, Хүүхдийн Төлөө Үндэсний зөвлөлийн тэргүүн Н.Учрал, “Эрдэнэт үйлдвэр” ТӨҮГ болон “Найрамдлын Эрдэнэс” хүүхдийн зуслангийн хамт олон, НҮБ-ын Хүүхдийн сан, Монголын Скаутын холбоо, Орхон аймгийн Цагдаагийн газар, Орхон аймгийн Онцгой байдлын газар, аймаг, дүүргийн Хүүхэд, гэр бүлийн хөгжил, хамгааллын газар, хэлтсийнхэндээ болон нийт оролцогч хүүхдүүддээ чин сэтгэлийн талархал илэрхийлье.

Хүүхэд, гэр бүлийн хөгжил, хамгааллын ерөнхий газар болон Монголын Хүүхдийн Зөвлөл нь хүүхдийн сайн сайхан, дуу хоолойг сонсож, тэдний оролцоог бодитоор дэмжсэн нийгмийг бүтээхийн төлөө цаашид ч идэвхтэй ажиллах болно хэмээсэн юм.