Хүүхдийн Төлөө Үндэсний зөвлөлийн гишүүд Монголын Хүүхдийн Урлан бүтээх төвийн үйл ажиллагаатай танилцлаа. Хүүхдийн Урлан Бүтээх төвийн дугуйлан, хөгжлийн хөтөлбөрт нийслэлийн 2 мянга гаруй хүүхэд тогтмол хамрагдаж байна.

Тус төв нь Улаанбаатар хотод хүүхдийн хөгжлийн үйлчилгээг ямар ч үнэ төлбөргүйгээр үзүүлж буй цорын ганц төрийн байгууллага юм. Тийм ч учраас эцэг эх, хүүхдүүдийн дунд маш их эрэлттэй байдаг. Гэвч анги танхим, хүний нөөцийн хүрэлцээнээс шалтгаалаад хүүхдүүдийн тоог хязгаарладаг гэж Хүүхдийн урлан бүтээх төвийн захирал Д.Уранбилэг хэллээ.

Монгол Улсын нийт хүүхдийн бараг 50 хувь нь Улаанбаатар хотод сурч хөгжиж байна. Цаашид төрөөс хөгжлийн үйлчилгээг эрчимжүүлж, хүүхдийн эрхийг хангахын тулд Хүүхдийн ордон, Урлан бүтээх төвийн салбар дугуйлан, хөгжлийн хөтөлбөрийг дэмжиж, идэвхжүүлэх шаардлага их гарч байна гэж Хүүхэд, гэр бүлийн хөгжил, хамгааллын ерөнхий газар-н дарга Б.Баярсайхан хэллээ.

ХГБХХЕГ-аас Монгол хүүхдийн урлан бүтээх төвтэй хамтран 21 аймаг, 9 дүүргийн газар, хэлтсүүдээр дамжуулан түр хамгаалах байранд үйлчилгээ авч буй хүүхдүүдийнхээ хөгжил, оролцоог дэмжих чиглэлээр хамтран ажиллана гэдгээ мэдээллээ.