Хэвлэл, мэдээллийн зөвлөлийн гүйцэтгэх захирал Г.Гүнжидмаа, Монголын Сэтгүүлчдийн нэгдсэн эвлэлийн дэд Ерөнхийлөгч З.Боргилмаа хэвлэл мэдээллийн байгууллагын төлөөлөл, СХД-ийн ХГБХХХ-ийн албан хаагчдыг оролцуулан “108 хүүхдийн шуурхай тусламж, хамгааллын төвөөс үйлчилгээ үзүүлж буй хүүхдүүдийнхээ мэдээллийг яагаад хуулийн хүрээнд мэдээлэх ёстой” талаарх ойлголтыг өглөө.

Хүүхдийн эрхийн тухай конвенц, Хүүхэд хамгааллын тухай хууль, Хувийн мэдээлэл хамгаалах тухай хууль, Төрийн албаны тухай хуульд заасан зохицуулалт, мэргэжлийн ёс зүйн үүднээс төрийн хамгаалалтад байгаа, үйлчилгээ авч буй хүүхдүүдийн эмзэг мэдээллийг нууцын зэрэглэлтэй байлгаж, ирээдүйн амьдралд нь учирч болох болзошгүй эрсдэл, хор хөнөөлөөс хамгаалах үүрэг, хариуцлагыг манай салбар тухайн хүүхдийн өмнө хүлээдэг.

Хагас жилийн байдлаар “108 хүүхдийн шуурхай тусламж, хамгааллын төв”-д 33,918 дуудлага ирснээс одоогоор 5,769 хүүхдийн тохиолдолд кейс нээж, хамгааллын үйлчилгээг харьяа дүүрэг, орон нутгууд тасралгүй үзүүлж байна.