ХГБХХЕГ-ын харьяа Сургалт, судалгааны төвд Австрали Улсаас хүрэлцэн ирсэн сайн дурын ажилтан, сэтгэл зүйч Амелиа Пюрвис мэргэжилтнээр ажиллаж байгаа бөгөөд өнөөдөр Нотолгоонд суурилсан удирдлага, шийдвэр гаргалтын чадавхыг бэхжүүлэх MEL сургалтыг “Хяналт, үнэлгээ, суралцахуй (Monitoring, Evaluation and Learning – MEL)” сэдвийн хүрээнд байгууллагын албан хаагчдад мэргэжил, арга зүйн сургалт, мэдээлэл хүргэлээ.

Сургалтын хүрээнд бодлого, стратеги болон төслийн хэрэгжилт, үр нөлөөг үнэлэхэд чиглэсэн нотолгоонд суурилсан нэгдмэл хандлагын арга зүйн ойлголтыг танилцуулж, хяналт-шинжилгээ, үнэлгээ болон үр суралцах үйл явцын уялдаа холбоо, үр дүнг байгууллагын үйл ажиллагаанд хэрхэн ашиглах боломжтойг тайлбарлаж, албан хаагчдын оролцоог хангаж, асуудалыг өөрсдөөр нь шийдүүлэх энгийн аргачлалыг ашигласан нь онцлог байна.

Хяналт-шинжилгээ нь мэдээллийг тогтмол, системтэйгээр цуглуулах, боловсруулах, ашиглах үйл явцыг хамардаг бол үнэлгээ нь нотолгоонд тулгуурлан үр дүн, нөлөөллийг хараат бусаар үнэлэх аргачлалд чиглэдэг болохыг тайлбарлав. Мөн суралцахуй нь хуримтлагдсан мэдээлэл, өгөгдөл, үнэлгээний үр дүнд үндэслэн байгууллагын гүйцэтгэл, хариуцлагыг сайжруулах, шийдвэр гаргалтыг дэмжих, тасралтгүй хөгжлийг бий болгоход чухал ач холбогдолтойг онцоллоо.

Амелиа Пюрвис нь хүүхэд хамгааллын салбарын Хяналт-шинжилгээ, үнэлгээ ба суралцах үйл явц (MEL) чиглэлээр ажиллаж, судалгааны арга зүй болон судалгааны ёс зүйн талаарх мэдлэг, ур чадварыг байгууллагын ажилтнуудад түгээн ажиллаж байна.