Жилийн зургаан хувийн хүүтэй ипотекийн зээлд хамрагдах хүсэлтийн үнийн дүн найман их наяд төгрөг хүрснийг Монголбанк мэдээллээ. Есдүгээр сарын 18-ны өдрийн байдлаар 7.9 их наяд төгрөгийн хүсэлт хүлээгдэж байгааг Монголбанк мэдээлж байсан бөгөөд нийт 53.5 мянган зээлдэгч ипотекийн зээлд хамрагдахаар хүлээж байгаа аж. Хөтөлбөрийн хүрээнд жилд дунджаар 8-10 мянган өрхөд зээл олгож буй нь эрэлтийг бүрэн хангахад 7-8 жилийн хугацаа шаардлагатайг харуулж байна. Засгийн газрын 2027 оны төсвийн төсөлд нийт 16 мянган өрхийг орон сууцтай болгохоор төлөвлөжээ. Үүнээс 14 мянган өрхийг жилийн зургаан хувийн хүүтэй ипотекийн зээлд, хоёр мянган өрхийг түрээслээд өмчлөх хөтөлбөрт хамруулахаар тусгаад байна. Үндэсний статистикийн хорооны 2025 оны хүн ам, орон сууцны тооллогын мэдээллээр Монгол Улсын өрхийн тоо нэг сая болж, 2020 оноос 12.1 хувиар өсжээ. Нийт өрхийн 336.4 мянга нь төвлөрсөн шийдэлтэй орон сууцанд амьдарч байгаа аж. Монголбанкны 2027 оны мөнгөний бодлогын үндсэн чиглэлийн төсөлд, 2013-2026 онд Монгол Улсын өрхийн тоо жилд дунджаар 20 мянгаар нэмэгдсэн нь орон сууцны эрэлтийг нэмэгдүүлж буй нэг хүчин зүйл болсныг онцолж байна.