ОХУ-ын Буриад улсын Ерөнхийлөгчийн нэрэмжит чөлөөт бөхийн 20 дахь удаагийн уламжлалт олон улсын тэмцээн Улаан-Үд энэ сарын 15, 16-ны өдрүүдэд боллоо. Энэ тэмцээнд манай тамирчид амжилттай оролцож, 2 алт, 4 мөнгө, 6 хүрэл, нийт 12 медаль хүртсэн байна.

Өчигдөр болсон барилдаануудын тухайд 61 кг-ын жинд олон улсын хэмжээний мастер Б.Номин японы бөхийг ялж хагас шигшээ барилдаанд якутын бөх В.Флегонтовыг 6:4 онооны харьцаагаар ялж алтан медалийн төлөө барилдаанд буриадын бөх, ОХУ-ын аварга Александр Богомоевт 2:8 онооны харьцаагаар дийлдэн мөнгөн медаль авч тус тэмцээнээс алт, мөнгө, хүрэл медалийн бүрэн цуглуулгатай болов. Олон улсын хэмжээний мастер Б.Баянмөнх хүрэл медалийн төлөө барилдаанд якутын бөх В.Флегонтовыг 5:4 онооны харьцаагаар ялсан аж.

Харин Н.Лхамгармаа хоёрдугаар тойрогт якутын бөх Борис Семёновыг ялж хагас шигшээ барилдаанд якутын бөх В.Флегонтовт 4:7 онооны харьцаагаар ялагдаж, мөнгөн медаль дээр буусан.

Мөн 70 кг-ын жинд олон улсын хэмжээний мастер Б.Анхбаяр хагас шигшээ барилдаанд манай бөх Д.Алтангэрэлийг ялж алтан медалийн төлөө тажикийн бөх Зелимхан Юсуповтой барилдаж өвдөг шороодож энэ тэмцээний хошой мөнгөн медальт бөх болов. Д.Алтангэрэл хүрэл медалийн төлөө оросын бөх Роман Вершинскийтэй, Б.Батсүх оросын бөх Исраил Касумов нарт ялагдсан юм. 86 кг-ын жинд олон улсын хэмжээний мастер П.Өсөхбаатар хагас шигшээ барилдаанд манай бөх О.Үйтүмэнг дийлж алтан медалийн төлөө японы бөх Мацумото Ацушитэй барилдаж хожигджээ. Хүрэл медалийн төлөө олон улсын хэмжээний мастер О.Үйтүмэн манай бөх Б.Бат-Эрдэнэ нар өрсөлджээ.

Манай хүнд жингийн шилдэг тамирчин, ОУХМ Ж.Чулуунбат 125 кг-д мөнгөн медалийн төлөө барилдаанд нутгийн бөх Н.Золбоог өвдөг шороодуулж, аваргын төлөө Украиний бөх Михаил Даценког хожсон. Ингэснээр Ж.Чулуунбат энэ тэмцээний хүрэл, 3 мөнгөн медаль дээрээ алтан медаль нэмлээ. Харин хүрэл медалийн төлөө олон улсын хэмжээний мастер Н.Золбоо манай бөх Ө.Батзулд ялагдсан байна.

Эх сурвалж: Шуурхай.мн