Непал улсын нийслэл Катманду хотод болсон газар хөдлөлтийн улмаас 1900 гаруй хүн амь үрэгдэж, 5000 орчим хүн гэмтэж бэртжээ. Газар хөдлөлт 7.8 магнитудын хүчтэй байсан байна. Катманду хотын 30 гаруй дүүрэг, хэсэгт олон арван байшин барилга нурж, хүмүүс дарагджээ. Мөн тус хотын ойролцоох Похато хотод газар хөдлөлт нэлээд хүчтэй мэдрэгдсэн байна. Газар хөдлөлтөнд нэрвэгдэж орон гэргүй болсон иргэд дахиж ийм гамшигт өртөж болзошгүй хэмээн уулын оройд гарч орогноход хүрч байжээ. Олон улсын байгууллагуудаас тасламжийн цуваа тус улсыг зорьсоор байна.
АНУ-аас гамшгийн газар орон дээр ажиллах мэргэжлийн баг илгээж, нэг сая ам.долларын тусламж үзүүллээ. Мөн Их Британиас гамшгийн бүс рүү мэргэжлийн аврах багуудаа явуулсан бол Пакистанаас нисэх багийн бүрэлдэхүүнтэй цэргийн эмч нар очиж, барилгын нуранги доороос амьд мэнд олдсон иргэдэд эмчилгээ сувилгаа хийж, үнэрч нохойнууд нь нурангинд дарагдсан хүмүүсийг олж илрүүлэхэд тусалж байна.
Непалын энэ удаагийн газар хөдлөлт тус улсад сүүлийн 80 жилд тохиолдоогүй хүчтэй, хөнөөл ихтэй боллоо. Гэхдээ 80 жилийн өмнө буюу 1934 онд болсон газар хөдлөлтөөр энд 8400 гаруй хүн амь үрэгдсэн юм.
Сүүлийн жилүүдэд тохиолдсон хүчтэй газар хөдлөлтүүдээс үзвэл 2008 онд БНХАУ-ын Сичуанд 7.9 магнитуд хүрч, 90 гаруй мянган хүн амь насаа алдсан бол 2010 онд Хайтид 7.0 магнитудын газар хөдлөлтөөс 220 мянган хүн амь үрэгдсэн байна.
Непалын газар хөдлөлтийн чичиргээ Эверест ууланд хүртэл мэдрэгдэж, цасан нуранги үүсчээ. Тэнд олон улсын уулчид уулын авиралт хийж байсан бөгөөд цасан нурангиас болж 17 уулчин амиа алдаж, 61 хүн гэмтэж бэртжээ. Монголын уулчин ОУХМ Б.Цэвээндаш, ОУХМ Гавъяат тамирчин, 74 настай Т.Гүррагчаа нар багийн гишүүдийнхээ хамт осолд харин өртөөгүй, эсэн мэнд яваа гэсэн мэдээтэй байна. Манай хоёр уулчин Эверестэд авирахдаа Төвдийн талаас авирсан тул цасан нуранги тохиолдоогүй бололтой.
Б.Отгонбаяр
Эх сурвалж: Tumen.mn
