Таван толгойн хөрөнгө оруулалтын гэрээг УИХ-аар хэлэлцүүлэхээр Засгийн газраас төслүүдээ өргөн бариад байгаа. Харин их хурлын чуулганаар эцсийн шийдэл яаж гарахыг таах аргагүй болов. Өчигдрөөс АН-ын зарим гишүүд уг гэрээний төслийг дэмжихгүй хэмээн зарлаж байна. Мөн “Эрдэнэс Таван толгой” ХК-ийн ажилчид гэрээний төслийн ажлын хэсгийг ахалсан М.Энхсайхан сайдыг онцруулахыг шаардлаа. Тэд гол нь гэрээг монголчууддаа ашиггүй нөхцөлөөр хийж буй болон иргэн бүрд оногдох 1072 хувьцааны талаар тодорхой зүйл тусгасангүй гэж буруутгаж байна. Шаардлагыг эс биелүүлбэл, Засгийн газрыг огцруулах хэмжээнд тэмцэл өрнүүлнэ гэлээ, тэд. УИХ дахь бие даагч гишүүд ч хөрөнгө оруулалтын гэрээг яаравчлан хэлэлцэж болохгүй гэв. Учир нь энэ гэрээний төсөлд Таван толгойн нүүрсний худалдаанаас олсон мөнгө гадаадын банканд байршиж, Монгол руу орж ирэхээргүй боллоо гэж үзэж байна. Үүнтэй зэрэгцээд бас “Баялгийн жинхэнэ эзэд” төрийн бус байгууллагаас “Ухаа худаг”-ийг эзэмшин олз ашиг олж буй “Энержи ресурс” компаниас 600 тэрбум төгрөг нэхэмжлэв. Тэдний тооцоогоор Таван толгойн ордын “Ухаа худаг”-ийн хэсгийг “Энержи ресурс” компани хууль бусаар эзэмшиж буй аж. Тиймээс эндээс олсон ашгийнхаа тал хувийг ард түмэндээ өгөх ёстой гэж үзжээ. “Энержи ресурс”-ийн хувь эзэмшигчдээс Г.Батхүү, Сү.Батболд гэх мэт хүмүүс УИХ-д сууж байгаа. Тиймээс Таван толгойн гэрээний төслийг хэлэлцэхэд тэдний нөлөөлөл ч мөн хүч түрж болзошгүй ажээ.
Б.Баяр
Эх сурвалж: Tumen.mn
