Э.Сайханбаатар: БНХАУ-ын багийг хожно гэдэгтээ итгэлтэй байна

Энэ мэдээ хуучирсан буюу 2015/05/11-нд нийтлэгдсэн мэдээ болно.

Э.Сайханбаатар: БНХАУ-ын багийг хожно гэдэгтээ итгэлтэй байна

Азийн зүүн бүсийн эрэгтэйчүүдийн аварга шалгаруулах волейболын тэмцээний эхний тоглолтууд өчигдөр “Буянт ухаа” спортын ордонд боллоо. Энэ удаагийн тэмцээнд Азийн зүүн бүсэд харьяалагддаг найман улс анх удаагаа бүрэн бүрэлдэхүүнээрээ оролцож байгаа гэдгээрээ онцлогтой юм. Тэмцээний эхний өдрийн дөрвөн тоглолтод Япон, Тайвань, Монгол, БНСУ-ын багууд эхний хожлоо авсан.Монголын шигшээ багийн тамирчид эхний тоглолтоо Хонгконгийн шигшээ багтаа хийж 3:0-оор ялалт байгуулсан юм. Тоглолтын туршид Монголын шигшээ баг нийт 78 оноо авснаас давуулалтаар нэг оноо, хаалтаар 10 оноо, хурдан довтолгоогоор гурван оноо, хүчтэй довтолгоогоор 40 оноо, эсрэг багийн алдаанаас 24 оноо авснаар эхний ялалтаа авлаа. Үүнээс Э.Сайханбаатар хүчтэй довтолгоогоор 20 оноог авсан байна. Тэд өнөөдөр хоёрдох тоглолтоо БНХАУ-ын тамирчидтай хийх бөгөөд хэрэв манай баг хожиж чадвал хагас шигшээд өрсөлдөх боломж нээгдэх юм. Өндөр нуруутай, хаалт өндөртэй БНХАУ-ын багтай манай тамирчид хэрхэн тоглох бол гэсэн хүлээлт хүн бүрийн дотор байгаа байх. Баг тамирчдын тоглолтын үр дүнд тэдний сэтгэл зүй маш ихээр нөлөөлдөг. Тиймээс нийт Монголчууддаа хандан “Буянт ухаа” спортын ордонд цуглаж Монголынхоо тамирчдыг дэмжин сэтгэлийн бэлэг барихыг хүсэж байна.

Баг тамирчдаа манлайлан тоглож багаа хожилд хүргэсэн Монгол Улсын шигшээ багийн тамирчин Э.Сайханбаатартай ярилцлаа.

-Өчигдөр хамгийн эхний учраа болох Хонгконгийн баг тамирчдыг 3:0- оор буулгаж авлаа. Сэтгэгдэл хэр байна вэ?

- Мэдээж сайхан байна. Өчигдөр зооны эхний тоглолтоо Хонгконгийн тамирчидтай тоглож 3:0- оор хожсон. Манай багийнхан багшийнхаа заасан тактикаар бүгд хичээж сайн тоглосон.

-Өнөөдөр хоёрдох учраа болох Хятадын тамирчидтай тоглоно. Ямар тактикаар тоглох вэ?

-Хятадын багийн тамирчид нуруу өндөр, нас залуу, хаалт сайтай байна лээ. Өнөөдөр багшийнхаа гаргасан өндөр хаалтын эсрэг тоглох тактикаар тоглоно доо.

-Өчигдөр Хятад, Солонгосын тоглолтын үзсэн байх. Таны хувьд Хятадын багтай яаж, ямар тактикаар тогловол зүгээр санагдсан бэ?

-Миний хувьд хаалт өндөртэй баг учраас бүгд арагшаа хамгаалах хэрэгтэй юм байна гэж бодсон. Мөн хагас довтолгоо, хууралт, сул бөмбөгнүүдийг ашигтай юм болов уу гэж анзаарсан.

-Хэрэв өнөөдөр хожил байгуулвал хагас шигшээд гарч медалийн төлөө өрсөлдөх боломжтой болно. Хожих боломжтой гэж бодож байна уу?

-Хожно гэдэгтээ итгэлтэй байна.

-Таны бодлоор энэ тэмцээний хамгийн хэцүү өрсөлдөгчөө аль улсын багийг гэж харж байна вэ?

-Энэ тэмцээнд муу баг ирээгүй байна лээ. Тэгэхээр бүх багууд хэцүү өрсөлдөгч. Гэхдээ миний анзаарснаар Ази тивээ төлөөлж Тив, дэлхийн чанартай тэмцээнд амжилттай оролцдогЯпон, Тайвань, Солонгосын багийг хүчтэй өрсөлдөгч гэж харж байгаа.

-Танд баярлалаа. Тэмцээнд тань амжилт хүсэж алтан медаль ерөөе.

-Баярлалаа. Монголчуудыгаа биднийг ирж дэмжээрэй гэж хэлмээр байна. Бид та бүхнийхээ халуун алга ташилтаас эрч хүч авч сайн тоглох болно.

Энэ удаагийн тэмцээнийг ТВ-9, МНС, Сүлд телевиз шууд дамжуулахаар болжээ.

Тоглолтын хуваарь: (Буянт-Ухаа спортын ордон)

V.10 (Ням гариг)

12.00 Япон vs БНАСАУ
14.00 Макао vs Тайвань
16.00 Нээлтийн ажиллагаа
17.00 Монгол vs Хонгконг
19.00 БНХАУ vs БНСУ

V.11 (Даваа гариг)

14.00 ХонгКонг vs БНСУ
16.00 Тайвань vs БНАСАУ
18.00 Япон vs Макао
20.00 Монгол vs БНХАУ

V.12 (Мягмар)

14.00 Макао vs БНАСАУ
16.00 БНХАУ vs ХонгКонг
18.00 Тайвань vs Япон
20.00 БНСУ vs Монгол тус тус тоглож хэсгийн тоглолт өндөрлөх юм.

Хэсэг бүрээс нэг, хоёрдугаар байраар шалгарсан багууд хүрэл болон алтан медалийн төлөө өрсөлдөнө. Тэмцээний хуваарийн дагуу лхагва гаригт тоглолтгүй өнжиж, пүрэв, баасан гаригт хагас шигшээ болон шигшээ тоглолтууд болох юм.

V.14 (Пүрэв)