Ерөнхий сайд асан Н.Алтанхуягийн хүргэн Г.Дэнзэн  эх орондоо эргэн иржээ. Түүнийг  АТГ-аас “Эрдэнэс Таван толгой”-н гүйцэтгэх захирал асан Я.Батсуурийн хэрэгт хамтатган сэжигтнээр татаж шалгахаар болсон байв. Харин тэр энэ чимээнээр хэргээс  бултахыг  оролдсон уу, эсвэл өөр шалтгаанаар уу гэдэг нь үл ойлгогдох байдлаар гадаад гарч яван сар гаруй  болоод ийнхүү эргэн иржээ. Г.Дэнзэнгийн эхнэрийн нэр дээр байдаг “Говь повер” компани нь “Эрдэнэс Таван толгой” команитай гэрээ байгуулж, тендерт шалгарсан гэх нэрээр ашиг  хөөцөлдөн,  эцэст нь шүүдэлцэж, нөхөн төлбөрийн асуудлаар маргаан үүсгэж,  энэ бүхэн нь  АТГ-ын хараанд өртөөд байсан юм. Я.Батсуурь нь “Намайг ямар ч үндэслэлгүйгээр сэжигтнээр татаж, цагдан хорьсон” хэмээн өчиж буй. Тэгвэл Г.Дэнзэнгийн үйлдэл хуульд нийцсэн эсэх ч бас эргэлзээтэй болж таарна. Гэхдээ Г.Дэнзэнг  тендерийн будлиан үүсгэсэн  байх магадлалтай хэмээн эх сурвалжууд хэлдэг. Юутай ч тэр Монголдоо ирсэн даруйдаа “Ганц худаг” руу ачигдсангүй. Я.Батсуурь шигээ гадуур байцаалтаа өгөх болов уу гэж зарим албаныхан ярьж байна.

Б.Баяр 

Эх сурвалж: Tumen.mn