Жин бүрийн шилдэг 16 жүдоч зодоглодог "World Masters" тэмцээн Марокко улсад амжилттай үргэлжилж байна. Тэмцээний эхний өдөр дэлхийн шилдэг 16 бөхчүүд барилдсанаас Монгол, Япон, ОХУ-ын бөхчүүд тус бүр хоёр алтан медаль авлаа. Манай жүдочдоос эмэгтэйчүүдийн 48 кг-д М.Уранцэцэг, 57 кг-д Д.Сумъяа нар аваргалж, шагналын 6000 ам. доллар хүртэн, олимпийн эрхийн 700 оноо халаасаллаа.
Гавьяат тамирчин М.Уранцэцэг алтан медалийн төлөө дэлхийн аваргын мөнгөн медальт Аргентиний Парето Паулаг 1 минут 16 секундэд өчих мэхээр ялсан бол ОУХМ Д.Сумъяа финалд Францын тамирчинг торгуулиар хожсон юм. Ийнхүү манай тамирчин Д.Сумъяа "Masters"-ийн хошой аварга боллоо. Мөн эрэгтэйчүүдийн 60 кг-д Г.Болдбаатар, 66 кг-д Д.Төмөрхүлэг нар хүрэл медаль хүртсэн байна.
