Сүүлийн үед ардчиллын мөн чанараас хазайж, Монгол Улсыг засаглалын хямралд оруулаад байгаа хэмээх шүүмжлэл дагуулах болсон АН-ын хэсэг залуус намаа, ардчиллаа аврах хөдөлгөөн өрнүүлээд байгаа билээ. Ийнхүү залуусын байгуулан тэмцэж байгаа АН-ын Шинэчлэлийн Хөдөлгөөн нь АН-ын олон мянган гишүүд дэмжигчдын талархалыг хүлээж буй.

      Тиймээс АН-ын Шинэчлэлийн Хөдөлгөөний залуус намынхаа гишүүд дэмжигчдэд болон ард түмэнд хандаж, нэгэн уриалга гаргажээ. Тус уриалгад юуны өмнө АН ээлжит бус Их хурлаа зарлан хуралдуулахыг шаардсан байна. Учир нь ардчиллын үнэт зүйлийг хадгалж, хэрэгжүүлж явах учиртай АН дотооддоо дайтаж, суудлын төлөө улайрах болсон. Төрийн түшээ бус төрийн түгжээгээр дүүрсэн. АН ахан дүүс, амраг садангаар дүүрч, гэр бүлийн нам болсон. УИХ-ын дарга, Ерөнхий сайд хоёр нь байнга зөрүүтэй мэдээлэл хийж, шударга үнэний төлөө явсан нэгнээ шүүх засаглалаар далайлгаж шоронд хорих болсон гээд олон шалтгаан байгааг дурдаад доорхи уриалгыг хүргүүлжээ. Уншигч та болгооно уу.